پیپلزپارٹی کی نئی سیاسی حکمت عملی ، پنجاب میں اپوزیشن لیڈر حمزہ شہباز سے روابط بڑھانے پرغور

 تفصیلات کے مطابق مسلم لیگ ن اورپیپلزپارٹی کے درمیان اختلافات کی  دراڑیں گہری ہونے لگیں،  ، مسلم لیگ ن کی نائب صدر مریم نواز کی جارحانہ سیاست  کے باعث پیپلزپارٹی  نے   نئی سیاسی حکمت عملی اختیار کرنے کافیصلہ کیا ہے ۔ ذرائع کے مطابق پنجاب میں  اپوزیشن لیڈر حمزہ شہباز سے روابط بڑھائےجائیں گے۔اس حوالے سے بلاول بھٹو اورحمزہ شہباز کےدرمیان ملاقات بھی  جلد متوقع ہے ۔  پیپلزپارٹی کے بعض رہنماؤں کا موقف ہے کہ مریم نواز کا طرز سیاست پی ڈی  ایم اتحاد کو نقصان پہنچا سکتا ہے، ن لیگ میں مفاہمت اور ٹھنڈے مزاج رکھنے والے رہنماؤں سے بھی روابط بڑھائے جائیں گے۔ ذرائع پیپلز پارٹی کے مطابق پی ڈی ایم سربراہی اجلاس میں بھی پیپلزپارٹی کا مریم نواز کی بجائے حمزہ شہباز کو شامل کرنے کی تجویز دیے جانے کا امکان ہے ۔

خیال رہے کہ سینیٹ میں اپوزیشن لیڈرکی تعیناتی کے معاملے پر پی ڈی ایم جماعتوں میں اختلافات برقرار ہیں ۔  مریم نواز کا کہنا ہے کہ ایک ’چھوٹے سے عہدے‘ کے لیے جمہوری مقصد کو نقصان پہنچایا گیا ہے تاہم بلاول بھٹو زرداری نے کہا ہے کہ وہ پی ڈی ایم کو نقصان نہیں پہنچانا چاہتے۔ دوسری جانب پاکستان پیپلز پارٹی کے چیئرمین بلاول بھٹو زرداری نے مریم نواز کے میڈیا بیان پر اپنے ردعمل میں پہلے تو یہ واضح کیا کہ وہ چیئرمین سینیٹ کے انتخاب کے معاملے پر جوڈیشل اپیل میں جائیں گے اور ’جب بھی عدالت ہمارے کیس کو میرٹ پر سنے گی تو کامیابی پی ڈی ایم کی ہی ہو گی۔‘ مریم صاحبہ کا ہم احترام کرتے ہیں۔ میں پی ڈی ایم کو نقصان نہیں پہنچانا چاہتا ہوں اور میں اس قسم کے الزامات پر بات نہیں کروں گا۔‘ ان کا کہنا تھا کہ چیئرمین سینیٹ اور اپوزیشن لیڈر بننے کا حق پیپلز پارٹی کا تھا کیونکہ وہ سینیٹ میں بڑی جماعت ہے۔