پنجاب میں یکم اپریل سے شادی کی تقریبات پر مکمل پابندی عائد ، ریسٹورنٹس اورپارکس بند

تفصیلات کے مطابق وزیراعلیٰ پنجاب کی زیرصدارت انسداد کورونا کابینہ کمیٹی کااجلاس ہوا ،  جس میں کوروناوائرس کی شدت کے پیش نظر سخت اقدامات کی توثیق  کی گئی ۔اجلاس میں این سی او سی کے فیصلوں پر سختی سے عملدرآمد کے لائحہ عمل کی منظوری دی گئی ۔   اجلاس کے بعد معاون خصوصی فردوس عاشق اعوان کے ہمراہ پریس کانفرنس کرتے ہوئے وزیراعلی ٰ پنجاب نے  بتایا کہ ہم کورونا وائرس کی تیسری خطرناک لہر کا مقابلہ کر رہے ہیں۔  کورونا کمیٹی میں اہم فیصلے لیے گئے ہیں ،    یکم اپریل سے وہ اضلاع جہاں کورونا کی شرح 12 فیصد سے زیادہ ہے وہاں لاک ڈاؤن لگانے کا فیصلہ کیا ہے، یہ لاک ڈاؤن 11 اپریل تک جاری رہے گا ۔

انہوں نے کہا کہ اس کے تحت اِن ڈور اورآؤٹ ڈور شادیوں کی تقریبات پر یکم اپریل سے پابندی عائدکردی گئی ہے  ۔ پارکوں میں بھی مکمل  پابندی عائد ،ریسٹورنٹس بند کرنے کا فیصلہ  کیا گیا ہے جبکہ  صرف ٹیک اوے کی اجازت ہوگی ۔ سوشل،سپورٹس تقریبات پر پابندی ہو گی۔  مائیکرو سمارٹ لاک ڈاؤن کی پالیسی اختیار کی جائے گی  جس  کے تحت ماسک پر سختی سے پابندی ہوگی ۔ ماس پبلک ٹرانسپورٹ، میٹرو اور اورنج لائن ٹرین بند کرنے کا فیصلہ کیا گیا ہے ۔  نجی ٹرانسپورٹ میں ماسک کیساتھ محدود افراد کو اجازت دی جارہی ہیں۔

وزیراعلی ٰ  پنجاب نے کہاکہ ہم معاشی سرگرمیوں میں کسی قسم کی کوئی پابندی نہیں لگا رہے ہیں ،  ہم صنعتیں بند کرنے کے حق میں نہیں لیکن ہمیں عوام کو تعاون چاہیے ، دکانوں کا وقت 6 بجے تک ہو گا، ہفتےمیں 2 دن دکانیں بند رہیں گی ۔

واضح رہے کہ ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے جس کے باعث حکام نے ایک مرتبہ پھر سخت پابندیوں کا انتباہ دیا ہے۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید41  افراد چل بسے جس کے بعد اموات کی مجموعی تعداد 14 ہزار256ہوگئی ہےجبکہ ملک میں کورونا کے فعال کیسز کی تعداد 46ہزار 663ہے، اب تک کورونا کے  6 لاکھ 59ہزار 116کیسز رپورٹ ہوچکے ہیں ۔