لاہورمیں ماسک نہ پہننے پر 96 ، ایس او پیز کی خلاف ورزی پر 120 مقدمات درج

جی این این کے مطابق لاہور میں ضلعی انتظامیہ نے کورونا ایس او پیز پر عملدرآمد کرانے کیلئے شہریوں پر سختیاں شروع کر دی ہیں۔ شہر میں ماسک نہ پہننے پر 96 افراد کے خلاف مقدمات درج کیے جا چکے ہیں، جبکہ کورونا ایس او پیز کی خلاف ورزی پر 120 مقدمات درج کیے گئے ہیں۔ 

تفصیل کے مطابق سٹی ڈویژن میں بغیر ماسک 31 جبکہ کورونا ایس او پیز کی خلاف ورزی پر 66 مقدمات درج کیے گئے جبکہ کینٹ ڈویژن میں  ماسک نہ پہننے پر26 ، اور کورونا ایس او پیز کی خلاف ورزی پر 2 مقدمات درج ہوئے ۔ ماڈل ٹاؤن ڈویژن میں بغیر ماسک پر 18 ، اقبال ٹاؤن میں  ماسک نہ  پہننے پر6  اور کورونا ایس او پیز کی خلاف ورزی پر 24 مقدمات درج  کیے گئے۔ اسی طرح سول لائنز ڈویژن میں  ماسک نہ پہننے  پر13 ،اور کورونا ایس او پیز کی خلاف ورزی پر 37 مقدمات درج ہوئے ۔ 

دوسری جانب وزیراعلیٰ پنجاب سردار عثمان بزدارنے کورونا وائرس سے نمٹنے سے متعلق قائم کابینہ کمیٹی کا اجلاس آج طلب کر رکھا ہے ۔ اجلاس میں کورونا وائرس کی روک تھام کیلئے کئے جانے والے اقدامات کا تفصیلی جائزہ لیاجائے گا اور عوام کی زندگیوں کو محفوظ بنانے کیلئے مزید ضروری اقدامات اٹھانے پر بھی غور کیا جائے گا۔ 

اجلاس میں محکمہ صحت پنجاب اور ضلعی انتظامیہ وزیراعلیٰ پنجاب کے سامنے سفارشات  رکھیں گے۔محکمہ صحت کی جانب سے لاہور میں کورونا کیسز میں خوفناک اضافے کے بعد مکمل لاک ڈاؤن کیلئے سفارشات تیار کی گئیں ہیں، محکمہ صحت تمام شادی ہالز، ریسٹورنٹ اور پبلک ٹرانسپورٹ بند کرنے کی بھی سفارش کرے گا۔ 

ذرائع محکمہ صحت کے مطابق تمام کاروباری مقامات، مارکیٹس کو مکمل بند کرنے کی بھی تجویز دی جائے گی۔ اور کہا جائے گا کہ پارکس اور تفریحی مقام مکمل بند کردئیے جائیں۔شادی کی تقریبات پر یکم اپریل سے مکمل پابندی عائد کی جائے۔