یہ ہار نہیں جیت کی جانب ہمارا اگلا قدم ہے:حمزہ شہباز

سماجی رابطے کی ویب سائیٹ ٹوئیٹ پر جاری پیغام میں حمزہ شہباز نے کہا کہ فل کورٹ کی استدعا مسترد کر کے غیرجانبداری کے اصول پر شب خون مارا گیا ہے۔

انہوں نے کہا کہ پانامہ فیصلے کا تسلسل انصاف ہرگز نہیں، میری سیاست عہدوں کے لیے نہیں خدمت کے لیے تھی، یہ ہار نہیں جیت کی جانب ہمارا اگلا قدم ہے۔ 

اس سے قبل سابق وزیر اعظم نواز نے اپنے ایک ٹوئیٹ میں سپریم کورٹ کے فیصلے پر ردعمل دیتے ہوئے کہا کہ ''پاکستان کو ایک تماشہ بنا دیا گیا ہے، تینوں جج صاحبان کو سلام۔''

واضح رہے کہ سپریم کورٹ آف پاکستان نے وزیر اعلیٰ پنجاب کے انتخاب سے متعلق ڈپٹی اسپیکر پنجاب اسمبلی دوست محمد مزاری کی رولنگ کو کالعدم قرار دیتے ہوئے پنجاب کابینہ تحلیل کر دی ہے۔

عدالتی فیصلے کے مطابق چودھری پرویز الٰہی نئے وزیر اعلیٰ پنجاب ہوں گے جبکہ گورنر پنجاب کو نئے وزیر اعلیٰ سے آج رات ساڑھے 11 بجے تک حلف لینے کا حکم دیا گیا ہے، گورنر حلف نہ لے سکیں تو اس صورت میں صدر مملکت حلف لیں گے۔