اسپیکر پنجاب اسمبلی کیلئے تحریک انصاف میں جوڑ توڑ ، بڑے نام زیرِغور

ذرائع کے مطابق  ا سپیکر پنجاب اسمبلی کیلئے پی ٹی آئی کے سینیئر رہنماؤں کے نام سامنے آئے ہیں۔ 

ذرائع  کے مطابق سابق وزیرخارجہ  شاہ محمود قریشی کے صاحبزادے زین قریشی  اسپیکر شپ کے لیے میدان میں  اترے ہیں جبکہ سابق وزیر اعلیٰ پنجاب عثمان بزدار بھی سپیکر کے منصب کے لیے متحرک ہیں۔

پارٹی رہنما سبطین خان اور میاں محمود الرشید بھی سپیکر شپ کی دوڑ میں شامل ہیں جبکہ میاں اسلم اقبال کے نام پر بھی غور کیا جا رہا ہے۔

 اسپیکر اور ڈپٹی اسپیکر کے عہدے کے لیے امیدوار وں کی لابنگ جاری ہے ، اس کے علاوہ ڈپٹی سپیکر کے لیے واثق قیوم اور ملک تیمور کے ناموں پر غور کیا جارہا ہے۔

اسپیکر اور ڈپٹی سپیکر پنجاب اسمبلی کے نام کی حتمی منظوری پی ٹی آئی کے چیئر مین عمران خان دیں گے۔

 اسپیکر کا عہدہ پرویز الہی کے وزیر اعلی بن جانے سے خالی ہوا ہے ۔ ذرائع کے مطابق دوست مزاری کے خلاف جلد عدم اعتماد تحریک پر کارروائی کا فیصلہ بھی کیا جائے گا ۔

واضح رہے کہ گزشتہ روز سپریم کورٹ آف پاکستان نے چوہدری پرویز الہٰی کی درخواست منظور کرتے ہوئے وزیرِاعلیٰ پنجاب کے انتخاب میں ڈپٹی اسپیکر پنجاب اسمبلی دوست محمد مزاری کی رولنگ کالعدم قرار دیدی تھی جبکہ پرویز الہٰی کو پنجاب کا وزیراعلیٰ قرار دیا تھا۔