اسلام آباد: چیئرمین سینیٹ محمد صادق سنجرانی نے کہا ہے کہ 23 مارچ کا دن تاریخی اعتبار سے انتہائی اہمیت کا حامل ہے جب ہمارے آباؤ اجداد نے قائد اعظم محمد علی جناحؒ کی زیر قیادت اپنی تقدیر بدلنے کا اہم فیصلہ کیا اور ایک علیحدہ ریاست کے قیام کیلئے حتمی لائحہ عمل اختیار کیا۔

آج ہی کے دِن لاہور میں قائد اعظم محمد علی جناحؒ کی قیادت میں وہ تاریخ ساز قرار داد منظور کی گئی تھی جو بعد میں قرار داد پاکستان کے نام سے مشہور ہوئی، اِس قراراداد نے منزل کا واضح شعور دیا جس کی وجہ سے صرف 7سال کے اندر مملکت پاکستان معرضِ وجود میں آگیا۔

سینٹ سیکرٹریٹ کے مطابق یوم پاکستان کے موقع پر اپنے خصوصی پیغام میں قوم کو مبارکباد پیش کرتے ہوئے محمد صادق سنجرانی نے کہا کہ ہمیں اس دن کی اہمیت کو حقیقی معنوں میں سمجھنے کی ضرورت ہے، ملک کی ترقی و خوشحالی کیلئے مشترکہ لائحہ عمل ناگزیر ہے، پاکستان امن پسند اور محبت کرنے والا ملک ہے اور اگر کسی نے ہماری خود مختاری اور علاقائی سلامتی کو چیلنج کرنے کی ہمت کی تو ہم بھر پور جواب دینے کی صلاحیت رکھتے ہیں۔

افواج پاکستان نے نہ صرف ملکی دفاع کو ناقابل تسخیر بنایا ہے بلکہ عالمی سطح پر دہشت گردی اور امن دشمنوں کے خلاف کارروائیوں میں کلیدی کردار ادا کیا ہے، افواج پاکستان کا شمار دنیا کی بہترین پیشہ وارانہ اور نڈر افواج میں ہوتا ہے۔

چیئرمین سینیٹ نے کہا کہ قائداعظم محمد علی جناحؒ کے افکار اور رہنما اصولوں اتحاد، ایمان اور تنظیم پر عمل کرتے ہوئے پاکستان کے تمام مسائل کو حل کیا جا سکتا ہے اور ملکی ترقی و خوشحالی کیلئے ہم سب کو سیاسی وابستگیوں سے بالا ترہو کر اقدامات اٹھانا ہوں گے۔

چیئرمین سینیٹ نے کہا کہ ہمیں ماضی کی غلطیوں اور مسائل سے سبق سیکھتے ہوئے ملک کے روشن مستقبل کے لئے موثر حکمت عملی اختیار کرنے کی ضرورت ہے۔پاکستان برصغیر کے مسلمانوں کی انتھک جدوجہد، جانی و مالی قربانیوں سے معرضِ وجود میں آیا۔

اس کی بقاء، سلامتی، یکجہتی، ترقی وخوشحالی کیلئے ملک کی تمام سیاسی جماعتوں اور اداروں کو مشترکہ لائحہ عمل اختیار کرنا چاہیے تاکہ لاکھوں جانی قربانیوں سے حاصل ہونے والا ملک ترقی وخوشحالی کی جانب گامزن ہو سکے۔

اس دن کا سب سے بڑا درس یہ ہے کہ ہم مل کر تمام حالات کا مقابلہ کر سکتے ہیں اگر ہم مل کر ایک جدوجہد کے بعد ایک عظیم ریاست بنا سکتے ہیں تو ہم متحد ہوکر اس ریاست کی تقدیر بھی بدل سکتے ہیں اور آج کے دور میں اس کی اشد ضرورت بھی ہے کہ ہم متحد ہو کر ملک کی ترقی و خوشحالی کے لئے کام کر سکیں۔

آیئے ہم سب پختہ عہد کریں کہ وطن عزیز کی مضبوطی اور سربلندی کے لئے ہم ایک زندہ اور پر عزم قوم کے طو رپر دنیا بھر میں اپنا لوہا منوائیں اورمفکر پاکستان علامہ محمد اقبالؒ او ر بابائے قوم قائد اعظم محمد علی جناح ؒ کے افکار کو مشعلِ راہ بناتے ہوئے اپنے مستقبل کا تعین کریں۔اللہ ہم سب کا حامی و ناصر ہو۔

نادرا (NADRA)نے’پاک آئی ڈی’ کےنام سےنئی موبائل ایپلی کیشن متعارف کروادی،پاکستانی شہری اب گھربیٹھے موبائل ایپ کے ذریعے شناختی کارڈ بنوا سکیں گے۔

نادرا کے چیئرمین طارق ملک  نے سماجی رابطے کی ویب سائٹ ٹوئٹر پراپنے بیان میں بتایا کہ نادراکی نئی ایپلیکیشن ایپ متعارف کرا دی گئی ہے۔

#یوم_پاکستان کے موقع پر @NadraPak اپنے ہم وطنوں کیلئے پیش کر رہا ہے شاندار سہولت #PakID موبائل ایپ📱

شناختی دستاویزات بنوانے کیلئے اب نادرا دفاتر جانے، لمبی قطاروں میں انتظار کی زحمت ختم، اپنا سمارٹ فون اٹھائیں، درخواست جمع کرائیں۔1#DigitalTransformation
#یوم_پاکستان_مبارک pic.twitter.com/neeFjoZDEy

— Tariq Malik ™ (@ReplyTariq) March 23, 2023

پاک آئی ڈی موبائل ایپ کی بدولت اب پاکستانی شہریوں کو شناختی کارڈاور فیملی رجسٹریشن کارڈ بنوانے کے لئے نادرا دفاتر جانے اور لمبی قطاروں میں انتظار کرنے کی بالکل ضرورت نہیں۔

شہری موبائل فون سےگھربیٹھےشناختی کارڈ،فیملی رجسٹریشن سمیت دستاویزات بنوا سکیں گے۔اس کےعلاوہ موبائل کے ذریعے ہی فنگر پرنٹس بھی دیئے جا سکیں گے۔

اسلام آباد: سپیکر قومی اسمبلی راجہ پرویزاشرف نے کہا ہے کہ یوم پاکستان تجدید عہد وفا کا دن ہے،ہمیں آپس کے اختلافات کو بھلا کر ملک کی تعمیر و ترقی کے لیے کردار ادا کرنے کی ضرورت ہے،پارلیمنٹ ہی واحد ادارہ ہے جہاں تمام مسائل کے حل کے لیے بات چیت کی جا سکتی ہے۔

یوم پاکستان کے موقع پر قوم کے نام مبارکباد کے پیغام میں انہوں نے کہا کہ یوم پاکستان تجدید عہد وفا کا دن ہے، 23مارچ1940 کادن برصغیر کی تاریخ میں ایک منفرد مقام رکھتا ہے، آج ایک پھر اسی جذبے کو دہرانے کی ضرورت ہے۔

سپیکر قومی اسمبلی نے کہا کہ آج سے 83 سال قبل جنوبی ایشیا کے مسلمانوں نے علیحدہ وطن کے لیے جدو جہد کی تھی،قرارداد لاہور کو منظوری کے بعد قرارداد پاکستان کا نام دیا گیا جس نے مسلمانوں کو نئی سمت اور سوچ دی اور تحریک آزادی کو نیا جوش اور ولولہ بخشا۔

راجہ پرویز اشرف نے کہا کہ قائدا عظم نے اسلام کے امن و برداشت اور انسانیت سے محبت کے اصول کو اپنا شعار بنایا،ان کی ولولہ انگیز قیادت سے برصغیر میں بسنے والی دیگر اقلیتیں بھی متاثر ہوئیں جو قائد کی مدبرانہ قیادت اور مقصد کے حصول سے سچی لگن کا کمال تھا،ہمیں بھی آپس کے اختلافات کو بھلا کر ملک کی تعمیر و ترقی کے لیے کردار ادا کرنے کی ضرورت ہے۔

سپیکر قومی اسمبلی نے کہاکہ ہمیں قائد اعظم کے اتحاد، یقین اور تنظیم کے رہنما اصولوں کو اپنانے کا عہد کرنا ہوگا، مملکت خداداد پاکستان اس وقت شدید بحرانوں سے گزر رہی ہے جن سے نبردآزما ہونے کے لیے ہمیں سیاسی اختلافات کو بھلانا ہو گا۔

سیاستدانوں کو ملک اور قوم کے لیے اجتماعی سوچ اپنانا ہو گی۔ راجہ پرویز اشرف نے کہاکہ ملک کا معاشی استحکام سیاسی استحکام سے جڑا ہوا ہے، پارلیمنٹ ہی واحد ادارہ ہے جہاں تمام مسائل کے حل کے لیے بات چیت کی جا سکتی ہے، دنیا میں موجود تنازعات کا حل بات چیت سے ہی ممکن ہو سکتا ہے۔