برطانیہ کے 100 سے زائد سینما گھر ملکہ کی آخری رسومات دکھائیں گے

خبر ایجنسی  کے مطابق برطانوی حکومت کا کہنا ہے کہ  پارکس، چوک ، گرجا گھروں میں بھی آخری رسومات دیکھنے کیلئے بڑی اسکرینیں لگائی جائیں گی۔

خبر ایجنسی کے مطابق ملکہ برطانیہ کی آخری رسومات کو تین  ٹی وی چینلز پر بھی براہ راست دکھایا جائے گا ۔ ملکہ برطانیہ کی آخری رسومات کل ہوں گی اور اس موقع پر برطانیہ میں عام تعطیل کا اعلان کیا گیا ہے ۔

برطانیہ کی  سب سے طویل حکمرانی کرنے والی ملکہ  الزبتھ  8 ستمبر کو 96 برس کی عمر میں انتقال کر گئیں تھیں ۔  ان  کی آخری رسومات میں دنیا بھر کے صدور، وزرائے اعظم اور شاہی خاندان کی شرکت متوقع ہے۔ 

رپورٹ کے مطابق ملکہ  کی آخری رسومات میں ڈچ بادشاہ ولیم الیگزینڈر، ملکہ میکسیما اور ولی عہد شرکت کریں گے ، بیلجیئم کے کنگ فلپ، ناروے کے بادشاہ ہرالڈ پنجم، موناکو کے شہزادہ البرٹ دوم بھی شریک ہوں گے۔

ڈنمارک کی ملکہ مارگریتھ اور اسپین کے بادشاہ فلیپ ششم اپنے والد، سابق بادشاہ جوآن کارلوس اوّل کے ہمراہ لندن پہنچ گئے ہیں۔

دوسری جانب ملکہ الزبتھ دوم کی آخری رسومات میں مدعو عالمی رہنماؤں کی فہرست جاری کردی گئی ہے ، برطانوی حکام کے مطابق آخری رسومات میں صرف ریاست کے سربراہان کو ایک یا دو افراد سمیت مدعو کیا گیا ہے۔  

جاپان کے شہنشاہ ناروہیٹو اور مہارانی ماساکو کو آخری رسومات میں شرکت کی دعوت دی گئی ہے، 2019 میں تخت سنبھالنے کے بعد یہ ان کا پہلا غیر ملکی دورہ ہے۔

برطانوی میڈیا کے مطابق امریکی صدر جوبائیڈن اور ان کی اہلیہ جل بائیڈن مہمانوں کی فہرست میں سرفہرست ہیں ، اس کے علاوہ فرانس کے صدرایمانوئل میکرون اور ترکی کے صدر طیب اردوان بھی شریک ہوں گے ۔ روس اور شمالی کوریا کے صدر جنازے میں شرکت نہیں کرسکیں گے ۔