پاکستان کو ماحولیاتی کانفرنس میں نہ بلانے پر ہونیوالے شور پر حیران ہوں : وزیراعظم

تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر ایک بیان میں کہا کہ   ماحولیاتی تغیرات کےحوالےسےایک اجلاس میں پاکستان کو مدعو نہ کئےجانےپر لگائی جانےوالی بےڈھب صدائیں سن کرحیران ہوں۔ہماری حکومت  اپنی آنے والی نسلوں کے لیے ماحولیاتی تبدیلی کے مہلک  اثرات کو کم کرنے اور انہیں سرسبز و شفاف پاکستان فراہم کرنے کے عزم پر عمل پیرا ہے۔

میں ماحولیاتی تغیرات کےحوالےسےایک اجلاس میں پاکستان کو مدعو نہ کئےجانےپر لگائی جانےوالی بےڈھب صدائیں سن کرحیران ہوں۔میری حکومت کی ماحولیاتی پالیسیز کا کُلیِّ مدار تو ماحولیاتی تغیرات کےمہلک اثرات کم کرنےکیلئےایک سرسبز و شفاف پاکستان اپنی آئندہ نسلوں کے حوالے کرنے کا ہمارا عزم ہے۔

— Imran Khan (@ImranKhanPTI) April 3, 2021

انہوں نے مزید کہاکہ اس سلسلے میں ہم نے  سرسبز پاکستان، بلین ٹرین سونامی، فطرت پر مبنی حل  اور دریاؤں کی صفائی جیسے اقدامات اٹھائے، خیبر پختونخوا سے بلین ٹری سونامی  منصوبے سے ابتدا کرتےہوئے  گزشتہ 7 سالوں کے دوران بہت تجربہ حاصل کیا ہے ۔ ہماری پالیسیوں کا اعتراف کیاجارہا ہے اور اسے سراہا جارہا ہے۔  انہوں نے کہاکہ پاکستان ایسے کسی بھی ملک کی مدد کیلئے تیار ہے جو ہمارے تجربات سے استفادہ کرناچاہتا ہے۔وزیراعظم نے مزید کہا کہ عالمی برادری اگر ماحولیاتی تغیرات کے مہلک اثرات سے نمٹنے میں سنجیدہ ہے تو میں  ماحولیاتی تغیرات کے حوالے سے اقوام متحدہ کے 2021 میں ہونے والے اجلاس (COP26) میں اپنی ترجیحات کی بھرپور وضاحت کرچکا ہوں۔

عالمی برادری اگر ماحولیاتی تغیرات کے مہلک اثرات سے نمٹنے میں سنجیدہ ہے تو میں ماحولیاتی تغیرات کے حوالے سے اقوام متحدہ کے 2021 میں ہونے والے اجلاس (COP26) میں اپنی ترجیحات کی بھرپور وضاحت کرچکا ہوں۔

— Imran Khan (@ImranKhanPTI) April 3, 2021

واضح رہے کہ امریکی صدر جو بائیڈن نے ماحولیاتی تبدیلی پر اپریل 22-23 کو ایک ورچوئل سمٹ (اجلاس) کا اعلان کیا ہے اور اس سلسلے میں 40 عالمی رہنماؤں کو مدعو کیا گیا ہے۔ اس ورچوئل اجلاس میں اس حوالے سے آگاہی دی جائے گی کہ ماحولیاتی تبدیلی کو روکنے سے بہتر نوکریاں فراہم کی جاسکیں گی، اعلیٰ ٹیکنالوجی تیار ہو گی اور کمزور ممالک کی مدد ہو سکے گی۔ وائٹ ہاؤس سے جاری بیان کے مطابق صدر بائیڈن چاہتے ہیں کہ عالمی رہنما اس سمٹ کو ایک موقع سمجھیں جہاں وہ بتا سکتے ہیں کہ ان کے ممالک کیسے ماحولیاتی تبدیلی کو روکنے کے لیے بہتر کردار ادا کر رہے ہیں۔