اٹلی کے خوبصورت جزیرے پر مفت رہائش، خوشخبری آگئی 

 بحیرہ روم کے دوسرے بڑے جزیرے سارڈینیا  کی جانب سے  لوگوں کو حیرت انگیز پیشکش  دی  گئی ہے ، سارڈینیا ، جزیرے پر آ کر بسنے والے افراد کو 15 ہزار یورو (35 لاکھ پاکستانی روپے سے زائد) فی کس دینے کی منصوبہ بندی کررہا ہے ۔

اگرچہ یہ تصور کرنا  ذرا مشکل ہے کہ اتنی خوبصورت جگہ پر منتقل ہونے کے لیے جزیرے کی جانب سے  لوگوں کو ادائیگی کرنے کی ضرورت ہوگی، لیکن سارڈینیا کی حکومت اس کیلئے خاصی سنجیدہ ہے کیونکہ  اس کا مقصد آبادی کی کمی  کا مقابلہ کرنے کے لیے نئے رہائشیوں کو ترغیب دینا  ہے۔

 سارڈینیا کی حکومت نے کروڑوں یورو کی رقم مختص کی ہے جو ہزاروں افراد کو دینے کے لیے کافی ہے۔سارڈینیا کو اٹلی نے علاقائی خود مختاری دی ہوئی ہے اور وہاں کے رہائشی اپنا صدر خود منتخب کرتے ہیں۔

سارڈینیا کے صدر کا اس حوالے سے  کہنا ہے کہ آبادی میں اضافے کے بغیر معاشی ترقی کا خواب ممکن نہیں اور اسی کو مدنظر رکھتے ہوئے نئی پالیسیوں پر کام کیا جارہا ہے۔

اس پروگرام میں دلچسپی رکھنے والے افراد کو سارڈینیا کے کسی ایسے قصبے میں قیام کرنا ہوگا جہاں کی آبادی 3 ہزار سے کم ہوگی اور انہیں جو رقم دی جائے گی وہ گھر کی تزئین و آرائش پر خرچ کی جائے گی اور انہیں اس قصبے میں وہاں کل وقتی قیام کرنا ہوگا،

اسی طرح 18 ماہ کے اندر اس فرد کو سارڈینیا کو اپنے مستقل پتے کے طور پر رجسٹر کروانا ہوگا۔ حکام کو توقع ہے کہ لوگ وہاں آسانی سے رہائش اختیار کرنے کے لیے تیار ہوجائیں گے۔

اگر آپ بھی خوبصورت جزیرے پر زندگی گزارنے  کی  خواہش رکھتے ہیں تو یہ پیشکش آپ ہی کے لیے ہے۔