مریم نواز نے مجھے کسی سفارش کےلیے نہیں کہا، شہباز شریف

اسلام آباد میں وفاقی وزراء کے ہمراہ نیوز کانفرنس میں شہباز شریف نے کہا کہ آڈیو لیک بہت ہی سنجیدہ معاملہ ہے، اس کی تحقیقات کےلیے اعلیٰ سطح کی کمیٹی بنارہے ہیں۔

انہوں نے کہا کہ اب کون ہم سے بات کرنے پاکستان آئے گا؟ یہ میری نہیں پاکستان کی عزت کی بات ہے۔

وزیراعظم نے مزید کہا کہ اقوام متحدہ میں عالمی رہنماؤں کے ساتھ حوصلہ افزا ملاقاتیں ہوئیں، چین اور روس کے صدور سے بھی ملے ۔

ان کا کہنا تھا کہ سیلاب نے وہ تباہی مچائی، جس کی تاریخ میں مثال نہیں ملتی، جس کے باعث 1600 سے زائد افراد جاں بحق ہوئے، عالمی فورم پر پوچھا کہ ہمیں ناکردہ گناہوں کی سزا کیوں ملی؟

شہباز شریف نے یہ بھی کہا کہ عالمی رہنماؤں کے سامنے ہم نے کشمیر اور فلسطین کے حوالے سے پاکستان کا بھرپور موقف پیش کیا۔

انہوں نے کہا کہ ہم نے اسلاموفوبیا کے بارے میں پاکستان کا موقف بھرپور انداز میں پیش کیا اور دنیا کے سامنے بھارت میں مسلمان کے ساتھ روا رکھے جارہے نارواسلوک کی مذمت کی۔