وزیراعظم نے تھرپارکرمیں 330 میگاواٹ کے بجلی گھرکاافتتاح کردیا

تفصیلات کے مطابق اس موقع پر وزیراعلی سندھ سید مراد علی شاہ نے وزیراعظم کو  پاک چین اقتصادی راہداری کے منصوبوں کے بارے میں تفصیلی بریفنگ دی ۔

وزیر اعلی نے بتایا کہ سی پیک ملکی معیشت کی تقدیر بد ل دے گا ،  تھر کے کوئلے سے بجلی کی پیداوار کے لئے شاہراہوں کے بڑے نیٹ ورک ، پلوں اور ہوائی اڈے کی ضرورت ہے۔

وزیر اعلی نے کہا کہ سندھ کی حکومت نے تھر کا بنیادی ڈھانچہ تعمیر کیا ہے جس پر 75 کروڑ ڈالر لاگت آئی ہے۔ انہیں بتایا گیا کہ پاکستان کے ارضیاتی سروے کے مطابق تھر میں 175 ارب ڈالر کے کوئلے کے ذخائر ہیں جنہیں مجموعی طور پر 13 بلاکس میں تقسیم کیا گیا ہے اور ہم بلاک ایک اور بلاک دو پر کام کررہے ہیں ، 2014 میں سی پیک کے تحت کوئلے سے بجلی پیدا کرنے کے منصوبے شروع کئے گئے اور 2015 میں وفاقی حکومت نے منصوبے کے لئے Sovereign گارنٹی جاری کی تھی۔

وزیر اعلی سندھ  نے کہا کہ اس سال کے آخر تک اس منصوبے کی پیداواری صلاحیت دوہزار چھ سو چالیس میگاواٹ تک بڑھائی جائے گی۔  انہوں نے مزید بتایا کہ 2030 تک تھر کے کوئلے سے ملکی معیشت میں غیر معمولی ترقی ہوگی ۔ 

وزیر اعلی نے کہا کہ تھر کے کوئلے کے منصوبوں سے حاصل ہونے والے منافع سے تھر میں 23 سکول قائم کئے گئے ہیں جن میں چارہزار 61 طلبا زیر تعلیم ہیں اس کے علاوہ مقامی لوگوں کی فلاح و بہبود کے لئے ضلع میں 120 بستروں کا ایک ہسپتال بھی قائم کیا گیا ہے۔