وزیراعظم مصر میں موسمیاتی تبدیلی عملدرآمد سربراہی اجلاس میں شرکت کرینگے 

یہ سربراہ اجلاس اقوام متحدہ کی 27ویں موسمیاتی تبدیلی کانفرنس کاحصہ ہے،  وزیراعظم اعلیٰ سطح کی دیگر تقریبات میں بحیثیت ایک مقرربھی شرکت کریں گے جن میں ایگزیکٹو ایکشن پلان کے لئے فوری انتباہ کے نظاموں کے اجراء کے لئے اقوام متحدہ کے سیکرٹری جنرل کی گول میزکانفرنس اورسعودی عرب کے ولی عہد شہزادہ محمدبن سلمان کی میزبانی میں آج ہونے والی مشرق وسطیٰ میں فضائی آلودگی سے نمٹنے سے متعلق اقدامات کی سربراہی کانفرنس شامل ہے۔

مصر کے ایوان صدرکی دعوت پروزیراعظم کل ناروے کے اپنے ہم منصب کے ہمراہ موسمیاتی تبدیلی اورکمزورطبقات کومضبوط بنانے کے بارے میں ایک اعلیٰ سطح کی گول میزکانفرنس کی مشترکہ صدارت کریں گے۔وہ سربراہ اجلاس کے موقع پر متعددعالمی رہنمائوں سے دوطرفہ ملاقاتیں بھی کریں گے۔

اقوام متحدہ کی 27ویں موسمیاتی تبدیلی کانفرنس ایسے وقت میں ہورہی ہے جب پاکستان اور دنیا کے دیگرعلاقوں میں لاکھوں افرادکوموسمیاتی تبدیلی کے تباہ کن اثرات کاسامناہے۔

دوسری جانب وزیراعظم شہبازشریف نے ایک ٹوئیٹ میں کہا کہ گروپ 77کے چیئرمین کی حیثیت سے وہ عالمی برادری پر زوردیں گے کہ موسمیاتی تبدیلی کے باعث ہونے والے نقصانات کے ازالے کیلئے فنڈز کی فراہمی کے وعدے کو پورا کیاجائے ۔

انہوں نے کہاکہ مصر میں ہونے والی سی او پی 27 کانفرنس موسمیاتی تبدیلی اور عالمی حدت میں اضافے سے نمٹنے میں مرکزی کردارادا کرسکتی ہے ۔

وزیراعظم نے کہا کہ رواں سال پاکستان اور افریقہ میں پیداہونے والے انتہائی موسمیاتی حالات عالمی سطح پررونماہونے والی موسمیاتی تبدیلی کوظاہر کرتی ہے۔

ان کا کہنا تھا کہ مالی مدد کے بغیر پسماندہ ممالک موسمیاتی تبدیلی کے متعدد خطرات کاسامنا کرتے رہیں گے۔

As Chair of G-77, I will urge the world to deliver on its commitment on climate finance & loss and damage fund. Without financial support, the developing countries will continue to remain exposed to the multifarious threats of climate change. We are asking for climate justice.2/3

— Shehbaz Sharif (@CMShehbaz) November 6, 2022

وزیراعظم شہبازشریف نے کہا کہ آفت کے بعد درکار ضروریات کے تخمینے سے ظاہر ہوتا ہے کہ سرکاری قرضوں ، عالمی سطح پر توانائی اور خوراک کی قیمتوں میں اضافے اور فنڈز کی عدم دستیابی کی وجوہات پاکستان کے بحالی کے سفر میں رکاوٹ پیدا کرسکتی ہیں۔

انہوں نے کہا کہ ہم موسمیاتی تبدیلی کے باعث انصاف مانگ رہے ہیں اور عالمی برادری کو پاکستان کے ساتھ منصفانہ برتائو کرناچاہیے۔