پاکستان تحریک انصاف لانگ مارچ : آج وزیرآباد سے دوبارہ سفر کا آغاز ہوگا

جی این این کے مطابق وزیر آباد سے شاہ محمود قریشی لانگ مارچ کی قیادت کرینگے جبکہ  فیصل آباد سے اسد عمر لانگ مارچ کی قیادت کریں گے  ۔

چئیرمین تحریک انصاف عمران خان ویڈیو لنک سے خطاب کرینگے ۔  

اس حوالے سے دونوں رہنماوں کے لئے الگ الگ کنٹینر تیار کئے گئے ہیں  ، کنٹینرز پر بلٹ پروف روسٹرم اور بلٹ پروف شیٹس لگائی گئی ہیں جبکہ سی سی ٹی وی اور ڈرون کیمروں سے مارچ کی مانیٹرنگ کی جائے گی ۔

 مارچ کے رستوں میں بلند عمارتوں پر اسنائیپرز تعینات کیے جائیں گے ۔ 

وزیراعلیٰ پنجاب چودھری پرویز الٰہی نے لانگ مارچ کے روٹ کی ڈرون اور سی سی ٹی وی کیمروں سے نگرانی کی  بھی ہدایت کی ہے۔

دوسری جانب خیبر پختون خوا میں تین مقامات سے شرکا لانگ مارچ کیلئے روانہ ہوں گے ، ہزارہ ریجن، جنوبی اضلاع اور مالاکنڈ ریجن سے بھی مارچ کیا جائے گا۔

گزشتہ روز پی ٹی آئی کے ٹوئٹر ہینڈل سے اعلان میں کہا گیا تھا کہ  قوم تیار ہے، کل سےلانگ مارچ کا آغاز اسی جگہ سے ہوگا جہاں چئیرمین عمران خان پرقاتلانہ حملہ ہوا تھا۔

قوم تیار ہے !
کل سےلانگ مارچ کا آغاز اُسی جگہ سے ہوگا جہاں چئیرمین عمران خان پرقاتلانہ حملہ ہواتھا #رُکنانہیں_جھُکنانہیں pic.twitter.com/VSdnW13fcG

— PTI (@PTIofficial) November 9, 2022

یاد رہے کہ تحریک انصاف نے گزشتہ ماہ کی 28 تاریخ کو لاہور سے لانگ مارچ کا آغاز کیا تھا جو 3 نومبر کو  جی ٹی روڈ پر وزیرآباد کے علاقے میں عمران خان پر فائرنگ کے بعد روک دیا گیا تھا ۔  واقعہ میں ایک کارکن جاں بحق جبکہ عمران خان سمیت گیارہ افراد زخمی ہوئے تھے ۔