تحریک انصاف کے لانگ مارچ کا تیسرا روز، لالہ موسی سے سفر کادوبارہ آغاز

تفصیلات کے مطابق سیکرٹری جنرل اسد عمر کی قیادت میں گوجرہ سے روانہ ہونے والے مارچ کا آغاز آج جھنگ انٹرچینج سے ہو گا ، تحریک انصاف کے رہنما اور کارکنان دربار سلطان باہو پر حاضری دیں گے ۔

اسد عمر شورکوٹ انٹر چینج سے گڑھ مہاراجہ پہنچیں گے۔ دربار سلطان باہو سے مارچ کے شرکا اٹھارہ ہزاری پہنچیں گے  جہاں  مارچ کا استقبال ایم پی اے اعظم چیلہ کریں گے۔

مارچ کا دوسرا پڑاو جھنگ موڑ پر ہوگا، جھنگ شہر میں جگہ جگہ استقبال کیا جائے گا ۔ مارچ کے اختتام پر جلسہ ہوگا۔  

دوسری جانب  نائب چیئرمین پی ٹی آئی شاہ محمود قریشی کی قیادت میں لانگ مارچ آج لالہ موسی سے روانہ ہوگا ، پی ٹی آئی قائدین کا کنٹینر گجرات سے لالہ موسی پہنچا دیا گیا ۔

لانگ مارچ پرانا  لالہ موسیٰ سے شروع ہو کر نئے لالا موسیٰ بازار آئے گا جہاں  لالہ  موسیٰ بازار میں مرکزی سٹیج تیار کیا جارہا ہے ۔  دن 2 بجے لانگ مارچ لالہ موسی بازار سے شروع ہوگا۔

تحریک انصاف کے رہنما شاہ محمود قریشی لالہ موسی روانگی سے قبل گجرات میں اہم پریس کانفرنس کرینگے۔

لانگ مارچ کے تیسرے روز اختتامی تقریب جھنگ سٹیڈیم میں ہوگی جہاں عمران خان ویڈیو لنک خطاب کریں گے۔

 تحریک انصاف نے گزشتہ ماہ کی 28 تاریخ کو لاہور سے لانگ مارچ کا آغاز کیا تھا جو 3 نومبر کو  جی ٹی روڈ پر وزیرآباد  میں عمران خان پر فائرنگ کے بعد روک دیا گیا تھا ۔  

واقعہ میں ایک کارکن جاں بحق جبکہ عمران خان سمیت گیارہ افراد زخمی ہوئے تھے ۔