ٹیم نروس نہیں ، فائنل میں سو فیصد کھیل پیش کریں گے : بابراعظم

تفصیلات کے مطابق میلبورن میں پریس کانفرنس کرتے ہوئے  قومی کپتان بابر اعظم نے کہا کہ سارے کھلاڑی فائنل کھیلنے کیلئے ایکسائٹڈ ہیں ،  ٹیم نروس نہیں، پریشر ہوتا ہے لیکن کوشش کریں گے دباؤ نہ لیں۔

ان کا کہنا تھا کہ انگلینڈ کی ٹیم بہترین ٹیم ہے ، ہماری ان سے ہوم سیریز بھی ہوئی ، قومی کپتان نے کہا کہ ٹورنامنٹ کا آغاز اچھا نہیں ہوا لیکن پھر ہم نے اچھا کم بیک کیا، تمام کھلاڑی شیروں کی طرح کھیلے۔

فائنل کے حوالے سے قومی کپتان نے کہا کہ  ابتدائی 6 اوور بہت اہم ہیں، ہمارا یقین اللہ پر ہے اور پورا بھروسہ بھی ہے ، ہمارا کام محنت کرنا ہے نتیجہ اللہ کے ہاتھ میں ہے ، فائنل میچ میں ٹاس کی اہمیت زیادہ نہیں ہے، موسم تو ہمارے ہاتھ میں نہیں لیکن دعا ہے کہ میچ مکمل ہو اور بارش سے متاثر نہ ہو۔

بابر اعظم نے کہا کہ سیمی فائنل میں ایلکس ہیلز اور جوز بٹلر نے جس طرح کھیلا وہ قابل تعریف ہے، ہمارے پاس بہترین پیس اٹیک ہے، فائنل میں جو پلان بنایا ہے اس پر عمل کرنا ہو گا۔

پاکستان کرکٹ ٹیم کے کپتان  کا کہنا ہے کہ ورلڈ کپ کا ٹائٹل جیتنے کا بہترین موقع ملا ہے، گزشتہ ورلڈ کپ کے سیمی فائنل تک پہنچے، پھر ایشیا کپ کا فائنل کھیلا تو کھلاڑیوں کا خواب ہے کہ وہ یہ موقع ہاتھ سے جانے نہ دیں۔

انہوں نے مزید کہا کہ ورلڈ کپ سے قبل ہمارے مڈل آرڈر پر کافی باتیں ہو رہی تھیں لیکن خوشی ہے کہ اس ورلڈ کپ میں مڈل آرڈر نے اچھا پرفارم کیا ، محمد حارث کو دیکھ کر لگ نہیں رہا کہ وہ پہلی بار ورلڈ کپ کھیل رہا ہے۔

چیئرمین پی سی بی سے ملاقات کے سوال پر بابر اعظم کا کہنا تھا کہ رمیز راجہ سے ملاقات خوشگوار رہی، انہوں نے کہا کہ کھل کر کھیلیں، اپنے گیم پر قائم رہیں۔