رونا لیلیٰ نے زندگی کی 70 بہاریں دیکھ لیں

17؍ نومبر 1952ء کو مشرقی پاکستان (موجودہ بنگلہ دیش) کے شمال مشرقی ساحلی شہر سلہٹ کے ایک متوسط سے گھرانے میں جنم لینے والی  رونا لیلیٰ کی والدہ شوقیہ گائیکی کرتی تھیں اور بڑی بہن دینا لیلیٰ بھی گائیکی سے شغف رکھتی تھیں ، لہٰذا رونا لیلیٰ کو یہ فن ورثہ میں ملا۔ 

رونا لیلیٰ نے کئی پاکستانی فلموں میں آواز کا جادو جگایا ، انہوں نے فنی کریئر کا آغاز 1965 میں پاکستانی فلم جگنو سے کیا ۔

پانچ دہائیوں پر مشتمل میوزیکل کیریئرمیں رونا لیلیٰ نے بے شمار گیت گائے ۔ رونا لیلیٰ نے بنگالی ، اردو ، پنجابی ، سندھی اور عربی سمیت 17 زبانوں میں اپنی آواز کا جادو جگایا ۔

1968ء میں جن اردو فلموں کے لیے موسیقاروں نے رونا لیلی کی آواز کو اپنی دھنوں سے سجایا ، ان میں ایک مسافر ایک حسینہ، بہن بھائی، بیٹی بیٹا، بزدل، پاپی، تاج محل ، جگنو، دل دیا درد لیا ، زندگی، سمندر، صاعقہ، عورت اور زمانہ، عاشق، کھلونا، کٹاری، کمانڈر، گھر پیارام گھر، محل اور ولی عہد شامل ہیں۔

 ان فلموں میں ہدایت کار جعفر ملک کی فلم ’’کمانڈر‘‘ کے اس گیت ’’جان من اتنا بتادو محبت محبت ہے کیا‘‘ کی بے مثل گائیکی کے صلے میں وہ نگار ایوارڈ سے نوازی گئیں۔ 

رونا لیلیٰ کے مشہور نغموں میں میرا بابو چھیل چھبیلا، جب ہم نہیں ہوں گے، یہ ادا یہ ناز یہ انداز آپ کا، کاٹے نہ کٹے رے رتیاں، سیاں جی کےنینوں سے، دل دھڑکے میں تم سےکیسے کہوں شامل ہیں۔

1966 میں ان کا ریلیز ہونے والا گیت ان کی نظروں سے محبت کا جو پیغام ملا نے انہیں راتوں رات شہرت کی بلندیوں پر پہنچا دیا۔  

انہوں نے پلے بیک سنگر احمد رشدی کے ساتھ متعدد دوگانے گائے ،  تین روز میں30 گانے ریکارڈ کروانے پر رونا لیلیٰ کا نام گنیز ورلڈ ریکارڈ بک میں بھی شامل ہے ۔

رونا لیلی ٰ ان دنوں اپنی فیملی کے ساتھ بنگلہ دیش میں مقیم ہیں ۔