جو بائیڈن کا 18سال سے زائد عمر کے نوجوانوں کیلئے کورونا ویکسی نیشن کا اعلان

تفصیلات کے مطابق  امریکہ میں 18سال سے زائد عمر کے افراد  19 اپریل سے ویکسین لگواسکیں گے۔ کوروناویکسی نیشن کےآغازکااعلان امریکی صدر جو بائیڈن نےکیا۔ اس موقع پر امریکی صدر  کا کہنا تھا کہ ہمارا ویکسین پروگرام کامیابی سے آگے بڑھ رہا ہے۔امریکا 150 ملین شاٹس کا انتظام کرنے اور 62 ملین افراد کو ویکیسن لگانے والا پہلا ملک ہے۔امریکی صدر نے ویکسی نیشن پروگرام کی رفتار کے حوالےسے خوشی کا اظہار کرتے ہوئے کہا کہ اس میں مزید کوئی ابہام نہیں ہے ۔تاہم   ہم ابھی تک اس کے خاتمے پر نہیں پہنچے ہیں ،  ابھی بہت کام کرنا باقی ہے۔ ہم ابھی بھی اس وائرس کے خلاف  زندگی اور موت کی دوڑ میں ہیں۔

امریکی صدر نے متنبہ کیا کہ " یہ وبا بے حد  خطرناک ہے ، وائرس کی نئی شکلیں تیزی سےپھیل رہی  ہیں۔ کیسز ایک بار پھر بڑھ رہے  ہیں ، اسپتالوں میں  داخل ہونیوالوں میں تاحال  کوئی کمی واقع نہیں ہوئی  ہے۔" انہوں نے شہریوں  کو احتیاطی تدابیر اپنائے رکھنے پر حوصلہ افزائی بھی کی ۔

خیال  رہے کہ امریکا میں اس سے پہلے 18 سال سے زائد عمر کے افراد کی ویکسی نیشن کی تاریخ یکم مئی مقرر کی گئی تھی۔

واضح رہے کہ امریکہ کورونا سے متاثرہ ممالک  میں سرفہرست ہے ، امریکہ  میں کورونا سے مرنے والوں کی کل تعداد 5 لاکھ 70  ہزار 260 تک پہنچ گئی ہے جبکہ 3 کروڑ 15 لاکھ 60 ہزار سے زائد متاثر ہیں۔

دوسری جانب عالمی وبا کورونا وائرس کے سبب دنیا میں 13 کروڑ 30 لاکھ 26 ہزار سے زائد افراد متاثر اور 28 لاکھ 86 ہزار 69 افراد ہلاک ہو چکے ہیں۔دنیا بھر میں کورونا سے صحت یاب ہونے والوں کی تعداد 10 کروڑ 72 لاکھ سے زائد اور فعال کیسز کی تعداد 2 کروڑ 28 لاکھ 73  ہزار سے زائد ہے۔