زرداری سے ملاقات کا کوئی ارادہ نہیں، تحریک انصاف میں شامل رہوں گا : جہانگیر ترین

تفصیلات کے مطابق بنکنگ کورٹ لاہور میں پیشی کے موقع پر میڈیا سے گفتگو کرتے ہوئے  جہانگیر ترین کا کہنا تھا کہ میری راہیں تحریک انصاف سے جدا نہیں ہوئیں، کون لوگ ہیں جنہوں نے مجھے خان صاحب سے دور کیا ،  میں تو دوست تھا دشمنی کی طرف کیوں دھکیل رہے ہیں ، جو بھی سازشیں کر رہے ہیں ان کو اب بے نقاب کیا جائے ۔اس سے تحریک انصاف کو فائدہ نہیں پہنچے گا ،میں نے 10 سال تحریک انصاف کیلئے کام کیا ہے ، تحریک انصاف میں شامل تھا اور شامل رہوں گا ۔

 تحریک انصاف کے رہنما جہانگیر ترین نے وزیراعظم عمران خان سے شکوہ کرتے ہوئے کہا کہ ان کی وفاداری کا امتحان لیا جا رہا ہے۔ مجھ پر ایک نہیں دو نہیں 3 ایف آئی آر درج کی گئیں، میرے اور میرے بیٹے کے بینک اکاؤنٹ منجمد کر دیئے گئے ، کیوں صرف  میرے پر ایف آئی آر ہیں۔ ایک سال سے یہ مجھ پر شوگر کمیشن چل رہا ہے، ہم تحریک انصاف سے انصاف مانگتے ہیں۔   ان کاکہنا تھا کہ کیا آپ کا کیس اتنا کمزور ہے کہ عدالت میں بات نہیں کرتے ، عمران خان انتقامی کارروائی کرنے والوں کو بے نقاب کریں۔

دوسری جانب بنکنگ کورٹ میں جہانگیر ترین اور علی ترین کی پیشی سے قبل ایم این ایز ، ایم پی ایزجہانگیر ترین کے گھر پہنچے، جہانگیر ترین کو تنہا نہیں چھوڑیں گے ، تحریک انصاف کے اراکین اسمبلی ڈٹ گئے . ایم این ایز ، ایم پی ایز اور وزیر اعلی کے مشیر   جہانگیر   ترین کے ہمراہ  کورٹ  پہنچے۔قومی و صوبائی اسمبلی اراکین نے جہانگیر ترین کو اپنی حمایت کا یقین دلا دیا۔

 لاہور کی بینکنگ کورٹ نے شوگر ملز میں جعلی بینک اکاؤنٹس کے معاملے پر جہانگیر ترین اور ان کے بیٹے علی ترین کی عبوری ضمانت میں توسیع کر دی۔ جہانگیر ترین اور علی ترین لاہور کی بینکنگ کورٹ میں پیش ہوئے، فاضل جج کے رخصت پر ہونے کے باعث سماعت بغیر کارروائی ملتوی کردی گئی ،   عدالت نے دونوں کی عبوری ضمانت میں 10 اپریل تک کی توسیع کی ہے ۔

واضح رہے کہ جہانگیر ترین کے خلاف منی لانڈرنگ کے الزام کے تحت مقدمہ درج ہے۔ وفاقی تحقیقاتی ادارے (ایف آئی اے) نے جہانگیر ترین اور علی ترین کے خلاف کیس درج کر رکھا ہے جہانگیر ترین اور علی ترین پر غیر قانونی طریقے سے رقوم کی منتقلی کا الزام ہے۔