میانمار کی حکومت نے 4 غیر ملکیوں سمیت 6 ہزار سیاسی قیدی رہا کردیئے

غیر ملکی خبر ایجنسی کے مطابق میانمار کی حکومت نے عام معافی کے تحت 6 ہزار سیاسی قیدیوں کی رہائی کا عمل شروع کردیا ہے۔

رہا کئے جانے والوں میں 4 غیر ملکی بھی شامل ہے، ان غیر ملکیوں میں سابق برطانوی سفیر وکی بومن، اقتصادی امور کے آسٹریلوی مشیر شان ٹرنل، امریکی ماہر نباتات کیاؤ ہتے او اور جاپانی صحافی تورو کوبوٹا ہیں۔ چاروں غیر ملکیوں کو رہا کر کے ملک بدر کردیا گیا ہے۔

جاپانی صحافی تورو کوبوٹا کو میانمار کی ایک عدالت نے حکومت مخالف مظاہرے کی عکس بندی کرنے پر 10 برس قید کی سزا سنائی گئی تھی۔

شان ٹرنل میانمار کی سیاسی رہنما آنگ سان سوچی کے اقتصادی امور کے مشیر تھے اور انہیں 3 سال قید کی سزا سنائی گئی تھی۔

میانمار کی فوج نے 2021 میں آنگ سان سوچی کی حکومت کا تختہ الٹا تھا، جس کے بعد ملک میں ہونے والے احتجاج کو دبانے کے لئے سیکڑوں افراد ہلاک اور ہزاروں جیلوں میں ڈالے گئے تھے۔