ایران نے 60 فیصد کی افزودگی کیساتھ یورینیم کی پیداوار میں اضافہ کردیا

ایران کے سرکاری میڈیا کے مطابق انٹرنیشنل اٹامک انرجی ایجنسی (آئی اے ای اے) کو خط لکھ کر اس بار ے میں مطلع کردیا گیا ہے۔

سرکاری میڈیا کا کہنا ہے کہ یورینیم افزودگی آئی اے ای اے کی حالیہ قرارداد کے جواب میں ہے۔

رپورٹس کے مطابق انٹرنیشنل اٹامک انرجی ایجنسی کی قرارداد میں کہا گیا ہے کہ ایران 3 غیر اعلانیہ جوہری سائٹس سے متعلق تحقیقات میں تعاون کرے۔

ایرانی وزارت خارجہ کے ترجمان ناصر کنعانی نے بین الاقوامی ایٹمی توانائی ایجنسی کی جانب سے منظور کردہ حالیہ قرارداد کو مسترد کرتے ہوئے کہا کہ یہ "ایران مخالف" اور "سیاسی طور پر محرک" ہے ۔  چار مغربی ممالک کی کارروائی کا مقصد ایران اور ایجنسی کے درمیان تکنیکی تعاون میں خلل ڈالنا ہے۔

ترجمان نے ہفتہ وار پریس کانفرنس میں کہا کہ ایران توقع کرتا ہے کہ  ایجنسی سیاسی اقدامات" سے گریز کرے  گی ،  بین الاقوامی جوہری نگران ادارے کے ساتھ ایران کے تعاون کو جاری رکھنے کی اجازت دی جائےگی تاکہ دونوں فریق "اچھے نتائج" حاصل کر سکیں۔

انہوں نے کہا کہ  آئی اے ای اے نے ایران کی جوہری سرگرمیوں کا زیادہ تر معائنہ کیا ہے ، ایران نے ہمیشہ پرامن جوہری سرگرمیاں کی ہیں اور وہ اپنی ذمہ داریوں کا احترام کرتا رہے گا اور جوہری مسائل پر ایجنسی کے ساتھ قریبی اور تعمیری رابطے میں رہے گا۔