ترکیہ میں زلزلے  کے جھٹکے

ترک میڈیا کے مطابق  زلزلہ  مقامی وقت کے مطابق صبح 4بجے کے قریب پیش آیا، زلزلے سے لوگوں میں خوف وہراس پھیل گیا اور لوگ گھروں سے باہر نکل آئے ۔

ترک میڈیا کے مطابق زلزلے کی شدت  ریکٹر اسکیل  پر  چھ اعشاریہ ایک  ریکارڈ  کی گئی ہے ۔ 

امریکی زلزلہ پیما مرکز کے مطابق  زلزلے کا مرکز استنبول کے مشرق میں 170 کلو میٹر دور تھا۔

امریکی زلزلہ پیما مرکز نے یہ بھی بتایا ہے کہ اس زلزلے کی گہرائی 10 کلو میٹر زیرِ زمین ریکارڈ کی گئی ہے۔

ترک میڈیا کے مطابق مختلف علاقوں  میں36  سے زائد  افراد زخمی ہوئے  ہیں ۔ وزیر صحت فرحتین کوکا نے ایک ٹویٹ میں بتایا کہ زخمی ہونے والوں میں سے 32 کا تعلق صوبہ ڈوزے، ایک استنبول اور دیگر2کا تعلق قریبی صوبوں بولو اور زونگولڈک سے ہے ۔

وزیر داخلہ سلیمان سویلونے گولیاکا کا دورہ کیا اور بتایا کہ ایک شخص گھبراہٹ میں بالکونی سے چھلانگ لگانے کے بعد شدید زخمی ہوا۔  زلزلے سے چند گودام تباہ ہوئے ہیں تاہم کسی بھاری مالی نقصان کی تاحال کوئی اطلاع موصول نہیں ہوئی ۔

انہوں نے کہا کہ زلزلے کے بعد اب تک 70 آفٹر شاکس ریکارڈ کیے گئے ہیں۔

 زلزلے  کے جھٹکے  قبرص  ، یونان ،انگلینڈ  اور  یوکرین  میں بھی  محسوس کئے گئے ہیں ۔