آرمی چیف سے روسی وزیر خارجہ سرگئی لاروف کی ملاقات ، آئی ایس پی آر

پاکستانی فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے روسی وزیر خارجہ سرگئی لاروف نے ملاقات کی ہے۔ ملاقات میں باہمی دلچسپی کے امور ، خطے کی سیکیورٹی صورتحال اور دفاعی تعاون بڑھانے کے حوالے سے بات چیت کی گئی، ملاقات میں بالخصوص افغان امن عمل کے حوالے سے بھی بات چیت کی گئی۔

آئی ایس پی آر کے مطابق معزز مہمان نے دہشتگردی کیخلاف جنگ میں پاکستانی کامیابیوں کو سراہا،  روسی وزیر خارجہ نے خطے میں امن و استحکام اور خاص طور پر افغان امن عمل کیلئے پاکستان کے کردار کو سراہا ہے۔

روسی وزیر خارجہ  سرگئی لاروف کا کہنا ہے کہ    پاک روس تعلقات مثبت سمت میں آگے بڑھ رہے ہیں، مستقبل میں مختلف شعبوں میں پاک روس تعلقات کئی شعبوں میں مستحکم ہوں گے۔

آرمی چیف جنرل قمر جاوید باجوہ نے کہا کہ  پاکستان روس کے ساتھ اپنے تعلقات کو انتہائی قدر کی نگاہ سے دیکھتا ہے، پاکستان بھی دوطرفہ فوجی تعاون کے فروغ کی خواہش رکھتا ہے، روس کے ساتھ بڑھتے ہوئے فوجی تعاون کو خوش آمدید کہتے ہیں۔