سوئی گیس کمپنی نے 3 وقت گیس فراہمی کے اوقات کار جاری کردیے

 سوئی گیس کمپنی نے لاہور میں 3 وقت گیس فراہمی کے اوقات کار جاری کردیئے، گھریلو صارفین کو صبح ، دوپہر اور شام تین وقت گیس فراہم کی جائے گی۔  سوئی ناردرن گیس پائپ لائنز کمپنی کی جانب سے کھانے پکانے کے اوقات میں گیس کی فراہمی  کا فیصلہ کیا گیا ہے۔ جس کے تحت ایس این جی پی ایل حکام نے لاہور میں 3 وقت گیس فراہمی کے اوقات کار جاری کردیئے ہیں۔ 

اوقات کار کے مطابق گھریلو صارفین کو صبح ، دوپہر اور شام تین وقت گیس فراہم کی جائے گی۔  گھریلو صارفین کو صبح 6 سے 9 بجے تک گیس فراہم کی جائے گی، دوپہر میں 12 بجے سے 2 بجے تک اور شام 6 بجے سے رات9 بجے تک گیس فراہم کی جائے گی۔ دوسری جانب لاہور کے صارفین نے گیس کی غیر اعلامیہ بندش اور پریشر میں کمی کی شکایات کی ہیں، اعوان ٹاؤن، جوہرٹاؤن، رضوان گارڈن، رانا ٹاؤن، اندرون شہر، گڑھی شاہو، ہربنس پورہ، تاج پورہ اور شالیمار کے بعض علاقے صبح کے اوقات میں گیس سے محروم ہیں۔ 

جنرل منیجر سوئی ناردرن تاج علی خان نے نجی ٹی وی سے گفتگو کے دوران کہا ہے کہ سردی آتے ہی گیس کی طلب بڑھ جاتی ہے، دور دراز علاقوں میں گیس کے مسائل ہیں، شہر میں نہیں۔ وزیرمملکت مصدق ملک کی ہدایت پر گیس فراہمی بڑھادی ہے، پشاور میں گیس سپلائی یومیہ7 کروڑ کیوبک فٹ سے بڑھا کر ساڑھے 9 کروڑ کردی گئی ہے۔ خیبرپختونخوا میں کھانے کے اوقات میں گیس کی ضرورت پوری ہو رہی ہے۔ 

انہوں نے بتایا کہ صبح 3 گھنٹے، دوپہر 2 اور شام کے اوقات میں 3 گھنٹے گیس دی جا رہی ہے، بل ریڈنگ کے مطابق بھیجے جاتے ہیں جنہیں شکایات ہوں وہ درخواست دیں۔انہوں نے بتایا کہ کم پریشر اور گیس کی قلت والے علاقوں میں سلنڈر دے رہے ہیں۔آن لائن قومی شناختی کارڈ کے اندراج سے گیس سلنڈر حاصل کیا جاسکے گا، 10کلو میٹر کے اندر گیس سلنڈر کی تبدیلی اور ڈیلوری فری ہوگی، نئے کنکشنز پر پابندی ہے، ان صارفین کو بھی گیس سلنڈرز دیے جائیں گے۔ 

جنرل منیجر تاج علی خان نے کہا کہ اوگرا کے ریٹ کے مطابق ایل پی جی سلنڈر دیئے جائیں گے۔پشاور میں ہدف کے مطابق 13 ہزار گیس سلنڈرز دیئے جائیں گے، لیک پائپ لائنز تبدیل کرکے نئی پائپ لائنز ڈالی جا رہی ہیں۔انہوں نے بتایا کہ خیبرپختونخوا میں 10لاکھ اور پشاور میں تقریباً 5 لاکھ گیس صارفین ہیں۔