چوری شدہ موبائل فون 24 گھنٹے میں بلاک ، نیا نظام متعارف

تفصیلات کے مطابق  پی ٹی اے کی طرف سے جاری ایک پریس ریلیز میں کہا گیا ہے کہ نیا سسٹم ان صارفین کے لئے مددگار ثابت ہوگا جو موبائل فون چوری ہونے ، چھیننے یا گم ہونے کی صورت میں اپنے موبائل فون کو بلاک کرنا چاہتے ہیں۔صارفین اپنے موبائل کے آئی ایم ای آئی بلاک کرانے کی درخواست دے سکتے ہیں۔

پی ٹی اے کے مطابق " گمشدہ اورچوری شدہ ڈیوائس سسٹم" ایک خودکار نظام ہے اور یہ پی ٹی اے  کے ڈیوائس شناخت اور بلاکنگ سسٹم (ڈی آئی آر بی ایس) کے ساتھ مربوط ہے۔

پریس ریلیز میں مزید کہا گیا ہے کہ شکایت کے اندراج اور ضروری تصدیق کے بعد چوری شدہ موبائل فون کو 24 گھنٹوں کے اندر بلاک کردیا جائے گا۔پی ٹی اے  کا کہنا ہے کہ  بلاک کرنے کی درخواست کے کامیاب اندراج کے بعد درخواست کنندہ کو حوالہ نمبر دیا جائے گا۔

صارفین پی ٹی اے کی ویب سائٹ پر آن لائن شکایات مینجمنٹ سسٹم (سی ایم ایس) کے ذریعے فون کو بھی بلاک کرسکتے ہیں۔  اور  مزید معلومات کے لئے صارفین پی ٹی اے کنزیومر سپورٹ سینٹر کے  ٹول فری نمبر 55055-0800 پر بھی رابطہ کرسکتے ہیں۔

پی ٹی اے کے مطابق گمشدہ فون ملنے پرشکایت کنندہ کو " اَن بلاکنگ"  کیلئے بھی اسی طریقہ کار پرعمل کرنا ہوگا۔موبائل فون ان لاک ہوجانے پر صارف کو فراہم کردہ نمبر پرایک ایس ایم ایس موصول ہوگا۔

اس سے قبل پی ٹی اے کے ٹول فری نمبر ، ویب سائٹ یا سی پی ایل سی کراچی کے ذریعہ چوری شدہ ، چھینی ہوئی اور گم شدہ موبائل فونز بلاک کیے جا رہے تھے۔ تاہم  نیا نظام متعارف ہونے کے بعد  یہ میڈیم موبائل  فونز کو بلاک  کرنے کے لئے دستیاب نہیں ہوں گے۔