اسپیکر قومی اسمبلی راجہ پرویز اشرف نے تحریک انصاف کو قومی اسمبلی میں واپسی کی دعوت دے دی۔

، ویسے ہی الیکشن کا سال ہے، پانچواں سال شروع ہے، پی ٹی آئی کے پاس مینڈیٹ ہے، توقع کرتا ہوں ممبران پارلیمنٹ میں آئیں کے اور نمائندگی کا حق ادا کریں گے،

کیوں کہ تمام مسائل کا حل پارلیمان کے اندر ہے، پارلیمان کے باہر نہیں، آج ضرورت ہے کہ ہم سب مل کر بیٹھیں، معیشت کو سہارے اور خوش گوار فضا کے لیے سب کو کردار ادا کرنا ہو گا، جس ملک میں پارلیمان مضبوط ہوگی تو حکومت مستحکم ہو گی اور الیکشن صاف شفاف اسی صورت میں ہوگا کہ ہم بہتر قانون سازی کریں، اگر اسمبلی میں نہیں آئیں گے تو ہم کس فورم پر اکٹھے ہوں گے؟ اسمبلی مدت پوری کرتی ہے تو نظام مضبوط ہوگا۔ 

راجہ پرویز اشرف نے کہا کہ پاکستان کی سیاست میں ٹھہراؤ آنا چاہیے، قانون سازی، امن و امان اور الیکشن اصلاحات کے لیے فورم پارلیمان ہے، ملک کے سارے سیاست دان منجھے ہوئے ہیں، تمام سیاسی جماعتوں کو اتفاقِ رائے سے معاملات کو سنبھالنا چاہیے، ایک بیک ڈور چینل بھی ہے جو ہمیشہ رہتا ہے، چھوٹے معاملات کو پسِ پشت ڈال کر بڑے مقصد کے لیے اکٹھے ہونا وقت کی ضرورت ہے، پارلیمنٹ کو نظر انداز کر کے آگے نہیں بڑھا جا سکتا، آصف زرداری معاملات کو سلجھانے والے اور آگے چلانے والے ہیں۔ 

اسپیکر قومی اسمبلی نے کہا کہ استعفے منظور کرنے کا طریقہ اور کچھ قواعد و ضوابط ہیں، جب تک میری تسلی نہیں ہوگی میں استعفیٰ قبول نہیں کروں گا، اگر کوئی آکر استعفیٰ دے اور مجھے علم ہو کہ اس پر دباؤ ہے تو میں استعفیٰ قبول نہیں کروں گا کیوں کہ یہ ابھی تک لاجز میں بیٹھے ہیں، مراعات لے رہے ہیں اور پیغام بھیجتے ہیں کہ اسپیکر صاحب ہمارا استعفیٰ قبول نہ کریں تو ایسے حالات میں بہت سوچنا پڑتا ہے، توقع کرتا ہوں کہ ممبران پارلیمنٹ میں آئیں کے اور نمائندگی کا حق ادا کریں گے۔