اسپیکر قومی اسمبلی راجا پرویز اشرف نے پاکستان تحریک انصاف کے 35 ارکان کے استعفے منظور کرلئے

اسپیکر قومی اسمبلی راجا پرویز اشرف کی جانب سے پی ٹی آئی کے 35 ارکان کے استعفے منظور ہونے کے بعد الیکشن کمیشن آف پاکستان نے ان ارکان کو ڈی نوٹیفائی کردیا۔

جن ارکان کے استعفے منظور کئے گئے ہیں ان میں شاہ محمود قریشی، مراد سعید، قاسم سوری، پرویز خٹک، اسد قیصر، شیخ راشد شفیق، اسد عمر اور علی زیدی شامل ہیں۔

الیکشن کمیشن کی جانب سے ڈی نوٹیفائی کئے گئے ارکان قومی اسمبلی میں عمر ایوب، شہریار آفریدی، زرتاج گل، فواد چوہدری، غلام سرور خان، عالیہ حمزہ اور کنول شوذب بھی شامل ہیں۔

اس کے علاوہ منصور حیات خان، فواد احمد، ثناء اللہ خان مستی خیل، حماد اظہر، شفقت محمود، عامر ڈوگر، فہیم خان، سیف الرحمان، عالمگیر خان، علی زیدی کے استعفے بھی منظور کرلئے گئے ہیں۔

پی ٹی آئی کے اراکین قومی اسمبلی آفتاب حسین صدیقی، آفتاب جہانگیر، محمد اسلم خان اور نجیب ہارون کی بھی استعفے کی منظوری کے بعد اسمبلی رکنیت ختم ہوگئی ہے۔

اسپیکر قومی اسمبلی کی جانب سے یہ اقدام ایسے وقت میں سامنے آیا ہے جب پی ٹی آئی اسمبلی میں واپس آنے کی تیاری کررہی ہے، اس حوالے سے ہونیوالے اجلاس میں پارٹی اراکین نے اختیار عمران خان کو دیدیا تھا۔

پی ٹی آئی اجلاس سے متعلق فواد چوہدری نے بتایا کہ قومی اسمبلی میں واپسی کے بعد پارلیمانی لیڈر، قائد حزب اختلاف اور چیئرمین پبلک اکاؤنٹس کمیٹی کے عہدے پی ٹی آئی کو ملیں گے، جس کیلئے پرویز خٹک کی سربراہی میں ایک کمیٹی بھی قائم کردی گئی ہے۔

واضح رہے کہ پاکستان تحریک انصاف نے اپنی حکومت کے خاتمے کے فوری بعد قومی اسمبلی سے استعفیٰ دیدیا تھا، قائم مقام اسپیکر قاسم سوری نے استعفے منظور کرلئے تھے تاہم نئے اسپیکر راجا پرویز اشرف نے استعفوں کی دوبارہ جانچ پڑتال کا فیصلہ کیا تھا۔