مرغی کے گوشت کی قمیت آسمان سے باتیں کرنے لگی

تفصیلات کے مطابق کراچی میں رمضان المبارک کی آمد سے قبل مرغی کی قیمتوں کو پر لگ گئے ہیں۔ مرغی کا گوشت 460 روپےکلو تک پہنچ گیاجبکہ زندہ مرغی کی 280روپے فی کلو فروخت جاری ہے۔شہر میں ایک ہفتے کے دوران مرغی کی قیمتوں میں سو روپے فی کلو کا اضافہ ہوا،،گزشتہ ہفتے مرغی کی قیمت 360 روپے فی کلو تھی۔

 دکانداروں کے مطابق مرغی کی مانگ میں اضافے،فیڈ اور دیگر اخراجات میں اضافے کے سبب قیمتیں بڑھی ہوئی ہیں جبکہ شہریوں کا کہنا ہے کہ رمضان المبارک کے دوران اشیاء کی قیمتیں بڑھنے سے مشکلات میں اضافہ ہوگا۔

دوسری جانب گزشتہ روز لاہورمیں بھی برائلر گوشت کی قیمت اضافہ دیکھنے میں آیا، برائلر مرغی کا گوشت جمعہ کے روز 3روپے مزید مہنگا ہونے کے بعد برائلرگوشت 354 روپے فی کلوگرام میں فروخت ہوا، صارفین نے برائلر مرغی مسلسل مہنگی ہونے پر پنجاب حکومت کو آڑے ہاتھوں لیا ہے۔شہریوں کا کہناتھا کہ ہرطرف سے مہنگائی کی مار پڑرہی ہے ،آمدنیوں کا تناسب مہنگائی کے حساب سے بہت کم ہے۔

لاہور میں بھی دو روز پہلےبرائلر گوشت کی قیمت میں 6 روپے فی کلو اضافہ ہوا تھا جس کے بعد مرغی کا گوشت 345روپے سے بڑھ کر 351 روپے فی کلو  فروخت ہوا تھا۔علاوہ ازیں شہرمیں سرکاری قیمتوں پر اشیا خورونوش کی فراہمی پر ناکامی کے بعد  پنجاب حکومت پولیس کو میدان میں لے آئی،ماہ رمضان میں بے جا مہنگائی کرنے والوں کی نشاندہی کے لئےسپیشل برانچ کی ڈیوٹیاں لگا دی گئیں۔ سپیشل برانچ ریڑھیوں اور بازاروں میں نرح ناموں کی چیکنگ کرے گی ،ریٹ لسٹ ڈسپلے نہ کرنے پرمتعلقہ اداروں کو رپورٹس فراہم کی جائیں گی۔

ان رپورٹس پر متعلقہ ادارے ذمہ داردکانداروں اور ریڑھی بانوں کے خلاف کارروائی کریں گے ۔سپیشل برانچ کے آج کے سروے کے مطابق پانچ فیصد ریڑھیوں اور بازاروں میں سرکاری قیمتوں والے نرح نامے موجود ہی نہیں ہیں۔