پی ٹی آئی کے پارلیمانی بورڈ نے ٹکٹوں کی تقسیم کا فارمولا طے کرلیا

 پاکستان تحریک انصاف کے پارلیمانی بورڈ نے ٹکٹوں کی تقسیم کا فارمولا طے کرلیا۔

میڈیا رپورٹس کے مطابق پی ٹی آئی نے دیرینہ اور پارٹی بیانیے کا ساتھ دینے والے سابق ارکان پارلیمنٹ کوٹکٹس دینے کا فیصلہ کیا ہے۔ پارٹی ذرائع کے مطابق پارٹی کے 80 فیصد سابق ارکان کو ہی ٹکٹس دیئے جائیں گے، 20 فیصد ٹکٹس نئے امیدواروں کو دیئے جائیں گے۔ 

جب کہ ن لیگ سے آنیوالے 5 سے 6 لوگوں کو بھی ایڈجسٹ کیا جائے گا۔ یاد رہے کہ گزشتہ روز لاہور ہائیکورٹ نے الیکشن کمیشن کو پنجاب میں الیکشن کی تاریخ دینے کا حکم دیا،لاہور ہائیکورٹ نے پی ٹی آئی کی درخواست منظور کرتے ہوئے الیکشن کمیشن کو پنجاب میں انتخابات کی تاریخ دینے کی ہدایت کی ۔ لاہور ہائیکورٹ نے پنجاب میں الیکشن کی تاریخ سے متعلق پاکستان تحریک انصاف کی درخواست پر محفوظ فیصلہ سنایا۔ 

عدالت نے تحریری فیصلہ بھی جاری کیا،جسٹس جواد حسن نے 16 صفحات پر مشتمل فیصلے جاری کیا،تحریری فیصلے میں کہا گیا کہ الیکشن کمیشن پنجاب میں فوری الیکشن کی تاریخ کا اعلان کرے،الیکشن کمیشن گورنر سے مشاورت کے بعد نوٹیفکیشن جاری کرے ۔

یقینی بنایاجائےکہ آئین میں دی گئی 90 دن کی مدت سے تجاوز نہ ہو۔ تحریری فیصلے کے مطابق گورنر کے دستخط کے بغیر اسمبلی خود تحلیل ہو تو اس صورت میں آئین نے کسی اتھارٹی کو تاریخ دینے کا پابند نہیں کیا،بطور خود مختار آئینی ادارہ ہونے کی حیثیت سے الیکشن کمیشن قانون کے مطابق الیکشن کرانے اور الیکشن کے انتظامات کرانے کا پابند ہے،

جبکہ فواد چوہدری نے لاہور ہائیکورٹ کے فیصلے پر ردعمل دیتے ہوئے الیکشن کمیشن کو کہہ دیا ہے کہ الیکشن کمیشن پرسوں تک الیکشن کی تاریخ اور شیڈول جاری کرے۔ 

فواد چوہدری نے کہا کہ ہم تو پہلے دن سے کہہ رہیں کہ سوائے اس کے آپ مارشل لا لگا دیں اور کوئی گنجائش ہی نہیں ہے کہ الیکشن کو ملتوی کیا جا سکے،آئین کے مطابق گورنر کی جانب سے الیکشن کی تاریخ دینا لازم ہے۔