اٹلی میں تارکین وطن کی کشتی ڈوبنے سے28 پاکستانی ہلاک

روم: اٹلی میں تارکین وطن کی کشتی ڈوبنے سے کلابریا کے ساحل پر 60 کے قریب افراد ہلاک ہو گئے، جن میں 28 پاکستانی بھی شامل ہیں۔

جنوبی اٹلی کے قریب ناہموار سمندر میں کشتی ڈوبنے سے 12 بچوں سمیت کم از کم 59 تارکین وطن ہلاک اور درجنوں لاپتہ ہونے کا خدشہ ہے۔

اٹلی کی انسا نیوز ایجنسی کے مطابق مرنے والوں میں ایک بچہ بھی شامل ہے جس کی عمر صرف چند ماہ تھی۔لاشیں ساحل سمندر سے قریبی ساحلی تفریحی مقام سے برآمد کی گئیں۔

کیلابریا کے علاقے میں ساحلی قصبے کروٹون کے قریب لینڈنگ کی کوشش کے دوران جہاز ٹوٹ گیا۔ 

کئی روز قبل ترکی سے روانہ ہونے والی اس کشتی میں افغانستان، پاکستان، صومالیہ اور ایران کے مسافر سوار تھے۔تنازعات یا غربت سے بھاگنے والے لوگوں کی ایک بڑی تعداد ہر سال افریقہ سے اٹلی کا رخ کرتی ہے۔

زندہ بچ جانے والوں نے بتایا کہ جہاز میں کم از کم 150 افراد سوار تھے۔

اٹلی کے صدر نے کہا کہ ان میں سے بہت سے مشکل حالات سے فرار ہو رہے تھے، وزیر داخلہ میٹیو پیانٹیدوسی نے جائے وقوعہ کا دورہ کیا، انہوں نے  کہا کہ تقریبا 30 افراد اب بھی لاپتہ ہیں۔

پاکستانیوں کا تعلق گجرات ،کھاریاں، منڈی بہائوالدین سے بتایاجارہا ہے۔