اگرالیکشن 90 روز سے آگے گئے تو پھر کبھی نہیں ہوں گے۔

پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ سپریم کورٹ میں تمام وکلا کا مؤقف تھا کہ الیکشن 90 دن میں ہونے چاہئیں۔

پی ٹی آئی رہنما فواد چوہدری نے سپریم کورٹ کے باہر میڈیا سے گفتگو میں کہا کہ انتخابات کی تاریخ کا اعلان کس نے کرنا ہے عدالت میں اس سوال پر بحث ہوئی، یہ پاکستان کی تاریخ کا اہم مقدمہ ہے۔

انہوں نے کہا کہ عدالتی عملے کے مطابق فیصلہ کل صبح گیارہ بجے سنایا جائےگا، ہم چاہتے ہیں سیاسی جماعتیں پولیٹیکل فریم ورک کی طرف بڑھیں،ان کے مطالبات یہ ہیں کہ پہلے عمران خان کو ڈس کوالیفائی کرو پھر نواز شریف کے کیسز معاف ہونے چاہیئں ان حالات میں کیسے اتفاق رائے ہو گا، عدالت سے استدعا کی کہ آئین کے مطابق چلنا چاہیے، اگر نوے روز سے آگے گئے تو پھر کبھی الیکشن نہیں ہوں گے۔

انہوں نے کہا کہ جسٹس منصور نے اتفاق رائے سے تاریخ طے کرنے کا کہا، ماضی میں رفیق تارڑ کو استعمال کر کے ججوں کو تقسیم کیا گیا، اب دوبارہ ن لیگ اسی روش پر چل پڑی ہے، پیپلز پارٹی اورن لیگ نے خود کو ضیاء الحق کا جانشین ثابت کیا ہے، سپریم کورٹ آئین کی محافظ ہے، سپریم کورٹ کو عوامی بحث کا حصہ نہ بنایا جائے، سپریم کورٹ کے ججز پر ہے کہ تقسیم کا حصہ بنتے ہیں یا  آئین کا تحفظ کرتے ہیں۔