براہموس میزائل غلطی سے فائر ہوا،عالمی سطح پر شرمندگی ہوئی، بھارتی حکومت کا بڑا اعتراف

بھارت کو گزشتہ برس پاکستان پر میزائل فائرنگ کی وجہ سے عالمی سطح پر کافی شرمندگی کا سامنا کرنا پڑا جس کا ذکر سرکار کی طرف سے عدالت میں کیا گیا ہے۔

خیال رہے کہ روس کے اشتراک سے تیار کروز میزائل 9 مارچ 2022ء کو ریاست ہریانہ سے داغا گیا تھا اور پاکستانی پنجاب کے علاقے میاں چنوں کے قریب گرا تھا۔ واقعے نے نئی دہلی کے لیے سفارتی مسائل پیدا کر دیے تھے۔

بھارتی حکومت نے دہلی ہائی کورٹ کو گزشتہ دنوں بتایا کہ پچھلے سال مارچ میں سہواً ایک براہموس میزائل فائر ہو گیا تھا جو پاکستان میں جاکر گرا۔ اس واقعے کی وجہ سے دونوں پڑوسی ملکوں کے درمیان جنگ جیسی صورت حال پیدا ہو سکتی تھی اور اس کے باعث بھارت کو بین الاقوامی برادری کے سامنے شرمندگی اٹھانی پڑی۔

بھارتی ایڈیشنل سالسٹر جنرل چیتن شرما نے دہلی ہائیکورٹ کو بتایا کہ بلاشبہ یہ وہ معاملہ تھا جہاں ہمیں عالمی برادری کے سامنے کافی شرمندہ ہونا پڑا۔ یہ میزائل بھارت میں نہیں گرا تھا بلکہ یہ پاکستان میں گرا تھا۔ اس کی وجہ سے جنگ کی صورت حال پیدا ہو سکتی تھی اور اس ملک نے اقوام متحدہ میں آواز اٹھائی۔

مودی حکومت دراصل بھارتی فضائیہ کے ایک افسر کی جانب سے دائر کردہ عرضی کے خلاف اپنے دلائل دے رہی تھی۔ یہ عرضی بھارتی فضائیہ کے ان 3 اہلکاروں میں سے ایک نے داخل کی ہے، جنہیں سہواً میزائل داغنے کا قصوروار قرار دیتے ہوئے فوج نے برطرف کر دیا ہے۔