حکومت رمضان المبارک میں عوام کی مشکلات کم کرنے کیلئے ہر ممکن اقدامات کررہی ہے:وزیراعظم

اسلام آباد: وزیراعظم شہبازشریف نے حکومت کی جانب سے فراہم کیا جانیوالا مفت آٹا حاصل کرنے کیلئے ان مستحق افراد کا فوری اندراج یقینی بنانے کی ہدایت کی ہے جو تا حال بینظیر انکم سپورٹ پروگرام کے ساتھ رجسٹرڈ نہیں ہوسکے۔

رمضان پیکج کے حوالے سے لاہور میں جائزہ اجلاس کی صدارت کرتے ہوئے وزیراعظم نے نادرا اور بے نظیر انکم سپورٹ پروگرام کو ہدایت کی کہ وہ رجسٹریشن کے لئے آٹا تقسیم کرنے کے پوائنٹس پر کاؤنٹرز قائم کریں۔

وزیراعظم نے کہا کہ حکومت رمضان المبارک کے دوران غریب عوام کی مشکلات کم کرنے کیلئے ہرممکن اقدامات کررہی ہے۔ انہوں نے کہا کہ مفت آٹے کی تقسیم پچیس رمضان المبارک تک جاری رہے گی۔

اجلاس کو بتایا گیا کہ مفت آٹے کی فراہمی کی سکیم پنجاب، خیبرپختونخوا اور وفاقی دارالحکومت اسلام آبادمیں جاری ہے۔

اجلاس کو بتایا گیا کہ پنجاب میں شادی ہالز میں تقسیم پوائنٹس قائم کئے گئے جہاں لوگوں کو اپنی باری کاانتظار کرتے ہوئے مفت آٹے کے حصول میں کسی پریشانی کاسامنانہیں کرناپڑے گا۔

وزیراعظم نے لاہوراورقصورمیں تقسیم پوائنٹس کے اچانک دورے بھی کئے اورانتظامات پر اپنے اطمینان کااظہارکیا۔انہوں نے اس پروگرام کے لئے پنجاب اورخیبرپختونخواکی حکومتوں سمیت اسلام آباد انتظامیہ کی کوششوں کی تعریف کی۔

اجلاس میں وفاقی وزراء شازیہ مری اورمریم اورنگزیب ،وزیراعظم کے مشیراحدچیمہ، پنجاب کے وزیراعلیٰ سیدمحسن نقوی اوردوسرے اعلیٰ حکام نے شرکت کی۔