بچوں کی موج مستیاں ختم،تعلیمی ادارے 67 دن بعد کھل گئے

جی این این کے مطابق ملک بھر میں تعلیمی سرگرمیاں دوبارہ بحال ہو گئیں ، سکولوں میں پہلی سے آٹھویں تک جبکہ کالجز اور جامعات میں تھرڈ ائیر سے پی ایچ ڈی تک کلاسز شروع ہوگئی ہیں۔ تعلیمی سرگرمیاں بحال ہونے پر بچوں کے ساتھ ساتھ  والدین اور اساتذہ بھی  خوش ہیں۔سکول کھلنے پر بچوں کی بڑی تعداد خوش نظر آئی، حکومت نے تعلیمی اداروں میں کورونا ایس او پیز پر عملدرآمد لازمی قرار دیا ہے۔

محکمہ سکول یجوکیشن اور ہائر ایجوکیشن کے مطابق طلبا کو متبادل دنوں میں بلایا جائے گا۔ہفتے میں تین ایک گروپ اور تین دن دوسراگروپ سکول آئے گا۔ سکولوں اور کالجز میں سمارٹ نصاب کے مطابق تعلیم دی جا رہی ہے جبکہ کچھ جامعات میں آن لائن اور بعض میں طلبا کے امتحانات آن کیمپس ہوں گے۔ 

واضح رہے کہ 26نومبر 2020 کو کورونا وائرس کی دوسری لہر  کے باعث پاکستان کے تمام سرکاری و نجی سکول کو  24 دسمبر تک بند کردیا گیا تھا  جس میں طلباء کو آن لائن پڑھانے کی اجازت دی گئی تھی۔اس کے بعد 25 دسمبر 2020 سے  10جنوری تک  موسم سرما کی تعطیلات دے دی گئی تھی۔

کورونا کیسز میں کمی کے بعد حکومت کی جانب سے 18 جنوری سے 9 سے 12 کلاس تک سکول کھولنے کی اجازت دی گئی تھی۔جب کے  پرائمری  سکولز اور یونیورسٹیز میں بھی تعلیمی سرگرمیاں آج (یکم فروری )سے بحال کرنے کے احکامات دیے گئے تھے۔