چین سے کورونا ویکسین لانے والا خصوصی طیارہ اسلام آباد پہنچ گیا

خصوصی طیارہ چین کے دارلحکومت بیجنگ سے کورونا ویکسین لا یا ہے۔  ڈاکٹر فیصل سلطان بھی پاک ٰفضائیہ کے خصوصی طیارے میں بیجنگ سے نور خان ایئر بیس پہنچے۔ ڈاکٹر فیصل سلطان نے سماجی رابطوں کی ویب سائٹ ٹوئٹر پر اپنے پیغام میں بتایا کہ سائنوفارم کی پہلی کھیپ پاکستان پہنچ گئی ، پہلی کھیپ میں کورونا ویکسین کی 5 لاکھ خوراکیں پاکستان لائی گئیں ۔ 

ڈاکٹر فیصل سلطان نے ڈاکٹرز اور فرنٹ لائن ہیلتھ ورکرز کو خراج تحسین پیش کیا ، انہوں نے کہا کہ کورونا ویکسین سب سے پہلے فرنٹ لائن ہیلتھ ورکرز کو دی جائے گی۔ ان کا مزید کہنا تھا کہ این سی او سی اور صوبوں نے کورونا سے نمٹنے میں اہم کردار ادا کیا۔ 

دوسری جانب  نے ابتدائی طور پر چینی کمپنی سائنوفارم سے ویکسین کی 12لاکھ ڈوزیز خریدی ہیں جو79 فیصد موثر ہے۔نیشنل کمانڈ اینڈ آپریشن سینٹر کے اجلاس میں بتایا گیا کہ اسلام آباد سے کورونا ویکسین صوبوں تک پہنچائی جائے گی۔این سی او سی نے ویکسین سٹریٹجی پلان کو تمام صوبوں اورسٹیک ہولڈرز کے ساتھ مشاورت کے بعد مرتب کیا ہے۔ویکسین پلان بہترین مروجہ عالمی اصولوں اور ہیلتھ گائیڈ لائنز کو مد نظر رکھتے ہوئے مرتب کیا گیا ہے۔