افراط زر کی بلند شرح 2025 تک جاری رہ سکتی ہے، آئی ایم ایف

واشنگٹن: آئی ایم ایف نے خبر دار کیا ہے کہ افراط زر کی بلند شرح 2025 تک جاری رہ سکتی ہے۔

فنڈ کے چیف اکانومسٹ پیری اولیور گورنچاس نے ایک انٹرویو میں کہا کہ عالمی سطح پر افراط زر کی موجودہ بلند شرح کے پیچھے کارفرما عوامل کے 2025 تک جاری رہنے کاخدشہ ہے۔

انہوں نے کہا کہ کورونا وائرس کی عالمگیر وبا کے بعد معیشت کی بحالی سےہی دنیا بھر میں اشیا کی قیمتوں میں تیزی سے اضافہ جاری ہے۔ گزشتہ سال یوکرین پر روسی حملے نے مہنگائی کی شرح میں مزید اضافہ کیا ہے۔

افراط زر کی شرح کو کنٹرول میں رکھنے کے لئے دنیا بھر کے ممالک کے مرکزی بینکوں نے شرح سود میں اضافہ کیا اس کے باوجود یہ شرح امریکا کے فیڈرل ریزرو اور دیگر ممالک کے مرکزی بینکوں کے 2 فیصدے کے اندازو ں سے تجاوز کر گئی۔

غذائی اشیا اور توانائی کے نرخوں کو کوششوں کے باجود کم نہ کیا جا سکا اور اس طرح بنیادی افراط زر کی شرح کو بھی کم کرنے میں ناکامی ہوئی۔ انہوں نے کہا کہ اب صورتحال یہ ہے کہ اس مہنگائی کے 2024 کے آخر تک بلکہ 2025 کے دوران بھی کم ہونے کے کوئی آثار نظر نہیں آرہے۔

اس صورتحال پر قابو پانے کی کوششو ں کے دوران مرکزی بینکوں کو شرح سود کو طویل عرصے تک بلند سطح پر رکھنا پڑے گا، اس کے نتیجے میں مالیاتی شعبہ جو امریکا کے سلیکون ویلی بینک کے خاتمے کے نتیجہ میں پہلے ہی شدید مشکلات کا شکارہے، پر اضافی دبائو پڑے گا۔