حکومت کے کالعدم ٹی ایل پی سے مذاکرات ہو رہے ہیں : وزیر داخلہ

تفصیلات کے مطابق وفاقی وزیر اطلاعات شیخ رشید نے  سوشل میڈیا پر جاری اپنے ویڈیو پیغام میں کہا  کہ کالعدم ٹی ایل پی سے حکومت کی بات چیت چل پڑی ہے، مذاکرات   پنجاب حکومت نے   کیے ، پہلا دور  کامیابی سے  مکمل ہوا ،  بات چیت کا دوسرا مرحلہ آج ہو گا۔وفاقی وزیر داخلہ کا کہنا تھا کہ بات چیت کے دوسرے دور  میں باقی معاملات بھی طے پا جانے کی امید ہے۔

انہوں نے کہا کہ کالعدم ٹی ایل پی نے یرغمال بنائے گئے 11 پولیس اہلکاروں کو چھوڑ دیا ہے،  ٹی ایل پی   کے لوگ مسجد رحمت اللعالمین سے  واپس جا چکے ہیں، جبکہ پولیس بھی پیچھے ہٹ چکی ہے۔شیخ رشید کا کہنا تھا کہ کم و بیش 192 ناکوں میں سے ایک ناکہ رہ گیا تھا اس میں بھی بہتری آگئی ہے۔باقی معاملات بھی جلد طے پا جائیں گے۔

واضح رہے کہ  وزارت داخلہ نے تحریک لبیک پاکستان ( ٹی ایل پی) کو کالعدم قرار دے دیا تھا۔ وزارت داخلہ کیجانب سے تحریک لبیک پاکستان پر پابندی کا نوٹیفکیشن جاری کردیا ہے۔ انسداد دہشت گردی ایکٹ 1997کے تحت تحریک لبیک پاکستان کو کالعدم قرار دیا گیا ہے۔

نوٹیفکیشن میں کہا گیا تھا کہ  تحریک لبیک پاکستان ملک میں دہشت گردی اور دوسرے گھناؤنے جرائم میں ملوث ہے۔ تحریک لبیک پاکستان  ملک میں لوگوں کواکسا کر انتشار پیدا کرنے میں ملوث ہے اس کے ساتھ ساتھ قانون نافذ کرنے والے اداروں کے اہلکاروں کی اموات اور زخمی کرنے میں بھی  ملوث ہے۔