عالم اسلام کو عید الفطر مبارک، اللہ تعالی سب کے روزے، تراویح، تہجد اوردیگر نیکیاں قبول فرمائے، خادم الحرمین الشریفین

ریاض: خادم الحرمین الشریفین شاہ سلمان بن عبدالعزیز نے سعودی عوام، مقیم غیرملکیوں اور امت مسلمہ کو عید الفطرکی مبارک باد پیش کرتے ہوئے کہا ہے کہ خواہش ہے کہ عید کا تہوار اپنے ہمراہ خطے میں امن و استحکام اور سکون و اطمینان کی خوشخبری لائے۔

سعودی خبررساں ادارے کے مطابق شاہ سلمان نے اپنے پیغام عید میں اس خواہش کا اظہار کیا کہ عید کا تہوار اپنے ہمراہ خطے میں امن و استحکام اور سکون و اطمینان کی خوشخبری لائے، ہمیں عید الفطر کی مبارکباد دیتے ہوئے خوشی محسوس ہورہی ہے۔

انہوں نے کہا کہ اللہ تعالی ہم سب کے روزے، تراویح، تہجد اوردیگر اچھے کام قبول فرمائے اور بار بار ہمیں یہ تہوارمنانا نصیب کرے، ہمارے ملک اور دنیا بھر کے ممالک پر امن و سلامتی اور اطمینان و سکون کا ماحول سایہ فگن ہو۔

شاہ سلمان نے کہا کہ اللہ تعالی نے اپنے فضل و کرم سے ہمیں منفرد اعزاز عطا کیا ، حرمین شریفین کی خدمت اور حج و عمرہ زائرین کے آرام و راحت کے انتظامات کا فرض بخشا ہے، یہ ایسا اعزاز ہے جس سے اللہ تعالی نے صرف ہمیں نوازا ہے۔

انہوں نے کہا کہ مقدس فرض کااحساس اور پاکیزہ ذمہ داری کی ادائیگی بڑے فخر کی بات ہے، بانی مملکت کے ہاتھوں سعودی ریاست کے قیام کے بعد سے لے کر اب تک اس فرض کی ادائیگی میں ہم دن رات ایک کیے ہوئے اور تن من دھن سے اس ذمہ داری کی ادائیگی میں لگے ہوئے ہیں۔ان کا کہنا تھا کہ بانی مملکت کے فرزند حکمران اس ذمے داری کو پابندی کے ساتھ ادا کرنا اپنے لیے فخر وناز کا باعث سمجھتے رہے، ہمیشہ اپنے اس عہد اور عزم پر قائم رہیں گے۔

شاہ سلمان نے کہا کہ اللہ تعالی کی بے شمار نعمتوں میں سے ایک یہ بھی ہے کہ اس نے اس سال رمضان المبارک کے دوران لاکھوں زائرین کو عمرہ ادا کرنے کی آسانی عطا کی، اللہ تعالی سے دعا گو ہیں کہ وہ زائرین سے عمرہ اور ہماری جانب سے ان کی خدمت قبول فرمائے، یہ سب کچھ اللہ تعالی کے فضل و کرم اور ریاستی اداروں کی جانب سے زائرین کی مسلسل خدمت کی وجہ سے ممکن ہوسکا ،سب نے زائرین کو عبادت کی ادائیگی میں ہر ممکن سہولت دی۔