عمران خان کی دہشتگردی کے 7مقدمات میں حفاظتی ضمانت منظور،2 میں توسیع

عمران خان کی دہشتگردی کے 7 مقدمات میں 10 دن کی حفاظتی ضمانت منظور کر لی گئی جبکہ دیگر 2 مقدمات میں 9 مئی تک عبوری ضمانت میں توسیع کردی گئی۔عدالت نے دس روز میں انسداد دہشتگردی عدالت سے رجوع کا حکم دیدیا۔

چیف جسٹس عامرفاروق کی سربراہی میں دو رکنی بینچ نے عمران خان کے خلاف مقدمات میں ضمانت کی درخواستوں پر سماعت کی جس میں عمران خان کے وکیل بیرسٹر سلمان صدر نے دلائل دیے۔

دوران سماعت چیف جسٹس نےکہا کہ ہم نے کہا تھا متعلقہ عدالت سے رجوع کرنے کے لیے پروٹیکشن دیں گے، آپ نے ابھی تک تفتیش بھی جوائن نہیں کی، آپ کو پہلی تاریخ سے باورکرایا تھا کہ ہم صرف پروٹیکشن دیں گے۔

دوران سماعت ایڈووکیٹ جنرل نے کہا کہ عمران خان کی میڈیکل رپورٹ جینوئن نہیں ہے۔فواد چودھری اورایڈووکیٹ جنرل جہانگیرجدون میں تلخ کلامی ہوئی جس پر عدالت نےفریقین کے رویےپر شدید برہمی کا اظہار کرتے ہوئے کہا کہ اب کوئی ایک لفظ نہ بولے۔

سابق وفاقی وزیر فواد چودھری کا کہنا تھا کہ باہرسیکیورٹی کا نہیں، خوفزدہ کرنے کا انتظام ہے، عمران خان عدالت زخمی حالت میں پیش ہوئے۔لاہور ہائی کورٹ نے 121 مقدمات میں فل کورٹ تشکیل دیا۔اس وقت صرف عمران خان عدالتی احکامات مان رہے ہیں۔