انتخابی عمل قبضہ عمل بن رہاہے، حافظ نعیم

صدر جماعت اسلامی کراچی حافظ نعیم الرحمان کا کہنا ہے کہ پیپلزپارٹی کراچی پر قبضے کےلیے بدترین فسطائیت کررہی ہے مگر ایسا نہیں ہونے دیں گے۔

میئر کراچی کےلیے جماعت اسلامی اور تحریک انصاف کے مشترکا امیدوار حافظ نعیم الرحمان نے کہا کہ انتخابی عمل قبضہ عمل بن رہاہے، وہ چاہتے ہیں ان کا قبضہ مزید بڑھ جائے۔ الیکشن کمیشن پیپلز پارٹی کی اے ٹیم کا کرداراداکررہی ہے۔ الیکشن کمیشن میں ضمیر ہے تو وہ اس صورتحال کا نوٹس لے۔

حافظ نعیم الرحمان کا کہنا تھا کہ پیپلز پارٹی انسانوں کو خرید رہی ہے یا جیلوں میں ڈال رہی ہے ، پی ٹی آئی کے آج جو چیئرمین اور وائس چیئرمین حلف اٹھانے آئے تھے ان کو گرفتارکیا گیا، کیسے ممکن ہے کہ ممبرز کو حلف کے وقت اٹھالیا جائے۔ جماعت اسلامی نے زیادہ سیٹیں حاصل کیں، شہر کے لوگوں نے جماعت اسلامی پر اعتماد کیا ہے، لوگ توقع رکھتے ہیں کہ میئرجماعت اسلامی کا ہوگا۔

انہوں نے مزید کہا کہ پی ٹی آئی کے لوگوں کو روک کریہ اپنے منہ پر کالک لگارہے ہیں، پولیس ان کے کہنے پر کام کرتی ہے کب تک یہ کرتےرہیں۔ کچھ بھی کرلومئیرجماعت اسلامی کاہی بنے گا۔ حکومت حوصلہ کرے اور ایک سروے کروائے لوگ کس کا مئیر چاہتے ہیں۔

حافظ نعیم الرحمان نے کہا کہ پی پی نے 6 سال تک بلدیاتی الیکشن نہیں کروایا تھا، بلدیاتی الیکشن کےلیے دھرنے دینے پڑے عدالت جانا پڑا۔ 9 لاکھ ووٹ تحریک اںصاف اور جماعت اسلامی کے ہیں، پی پی کے 3 لاکھ ووٹ بھی نہیں ہے، عوام نے جماعت اسلامی کو بھاری مینڈیٹ دیاہے۔