سکھر میں نامعلوم افراد نے صحافی جان محمد کو فائرنگ کر کے قتل کر دیا

سکھر: سکھر میں نامعلوم افراد نے فائرنگ کرکے صحافی جان محمد مہر کو قتل کردیا۔

پولیس کے مطابق صحافی جان محمد پر دفتر سے گھر جاتے ہوئے کوئینز روڈ پر حملہ کیا گیا جس کے باعث وہ زخمی ہوگئے۔

صحافی کو تشویشناک حالت میں نجی اسپتال منتقل کیا گیا تاہم وہ جانبر نہ ہوسکا اور دوران علاج اسپتال میں دم توڑ گیا۔

ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (اے ای ایم این ڈی) نے کہا کہ وہ نامعلوم افراد کی فائرنگ سے سینئر صحافی جان محمد مہر کے قتل کی مذمت کرتی ہے۔

اے ای ایم این ڈی نے مزید کہا: "صحافیوں کو تحفظ فراہم کرنا حکومت کی ذمہ داری ہے، وزیر اعلیٰ اور انسپکٹر جنرل (آئی جی) سندھ حکام سے معاملے کی تحقیقات کرائیں"۔

جس میں وزیر اعلیٰ اور آئی جی سندھ سے مطالبہ کیا گیا کہ صحافی جان محمد کے قاتلوں کو فی الفور گرفتار کیا جائے۔

دوسری جانب خیبرپختونخوا کے شہر ہنگو میں نامعلوم افراد نے مقامی صحافی فاروق پراچہ کے گھر پر فائرنگ کردی۔

پولیس کے مطابق فائرنگ سے صحافی کی گاڑی اور گھر کے دروازے کو جزوی نقصان پہنچا۔ پولیس نے فائرنگ کے واقعے کی تحقیقات شروع کر دی ہیں۔