میٹرو ٹرین پل سمیت سٹرک پر گرنے سے درجنوں افراد ہلاک

غیر ملکی میڈیا کے مطابق  میکسیکو سٹی  کے میئر کا کہنا ہے کہ حادثہ میٹرو اوور برج گرنے کے باعث پیش  آیا،جس کی وجہ سے ٹرین پل کے ساتھ نیچے روڈ  سے جا ٹکرائی۔اس حادثے میں  کم از کم 23 افراد  جان کی بازی ہارے جس میں بچے بھی شامل تھے۔

پُل کا ملبہ اور ٹرین کے ڈبے گاڑیوں پر گرنے سے 23 افراد ہلاک اور 50 زخمی ہوگئے جب کہ درجنوں گاڑیاں تباہ ہوگئیں۔

ریسکیو ادارے نے پُل کے کمزور ہونے پر ٹرین کو اتارنے کا عمل روک دیا ہے۔ واقعے کی تحقیقات کے لیے انکوائری کمیٹی تشکیل دیدی گئی ہے۔ زخمیوں میں سے 4 کی حالت نازک بتائی جارہی ہے۔

میئر میکسیکو سٹی کے ہمراہ  نیوز کانفرنس سے خطاب کرتے ہوئے صدر آندرس مینوئل لوپیز اوبریڈور نے متاثرہ افراد کے لواحقین سے اظہار تعزیت کیا اور کہا کہ میکسیکو کے عوام سے "کچھ بھی پوشیدہ نہیں" رکھا جائے گا۔

سوشل میڈیا پر وائرل ہونے والی ویڈیوز اور تصاویر میں ٹرین کے ڈبوں کو پُل سے گرتے ہوئے دیکھا جا سکتا ہے جب کہ ملبے اور ٹرین کے ڈبوں تلے درجنوں گاڑیاں دبی ہوئی ہیں۔

یاد رہے مقامی میڈیا کے مطابق ، رہائشیوں نے 2017 کے مہلک زلزلے کے بعد اس پل کے ڈھانچے میں دراڑیں پڑنے کی اطلاع حکام کو دی تھی۔ دنیا کے مصروف ترین شہروں کے میٹرو سسٹم میں یہ اب تک کا  سب سے مہلک واقعہ ہے۔