نیب نے شرجیل میمن کی درخواست پر جواب نامہ عدالت کو جمع کرادیا

سابق صوبائی وزیر شرجیل میمن و دیگر کے خلاف پونے چھ ارب روپے کی کرپشن کے ریفرنس کی سماعت کراچی احتساب عدالت میں ہوئی۔

نیب نے اپنے جواب میں کہا  کہ ملزمان کے خلاف ریفرینس دائر ہے کہ ملزمان نے اختیارات کا ناجائز استعمال کیا ہے، ملزمان  2013 سے 2015 کے دوران اختیارات کا ناجائز استعمال کرتے رہے ہیں  جس کے شواہد بھی  موجود ہیں۔

نیب کا کہنا ہے کہ شرجیل میمن نےاپنے اور بےنامی لوگوں کے نام جو غیرقانونی اثاثے بنائے اس کی فہرست بھی پیش کی جا رہی ہے، کسی کے ذاتی مفاد سے متعلق ریفرنس میں کوئی ذکر نہیں ہے۔

شرجیل میمن کا مؤقف: شرجیل میمن نے نیب میں دائر درخواست پر اپنا مؤقف اپنایا کہ کس ملزم نے کتنا ذاتی فائدہ حاصل کیا ہے انفرادی طور پر بتایا جائے۔

تفتیشی افسر کی عدم موجودگی  پر عدالت نےسخت  برہمی کا اظہار کرتے ہوئے استفسار کیا کہ تفتیشی افسر کدھرہے؟

نیب پراسیکیوٹر نے کہا کہ تفتیشی افسر لاہور گئےہوئے  ہیں، اسی وجہ سے پیش نہیں ہوئے۔

عدالت نے ریمارکس دیتے ہوئے کہا کہ لاہور کیا لندن میں ہے جو تفتیشی افسر پیش نہیں ہو سکتے، تفتیشی افسر کو شوکاز نوٹس جاری کر رہے ہیں۔

عدالت نے ریفرنس کی مزید سماعت 8 ستمبر تک ملتوی کر دی۔