بھارت کی ایک اور سینئر اداکارہ کورونا سے چل بسیں

بھارتی میڈیا کے مطابق  ساؤتھ انڈین اداکارہ سری پراڈھاحال ہی میں کورونا کا شکار ہوئی تھیں ،  کورونا میں مبتلا ہونے کے بعد ان کی حالت روزبروز بگڑتی جارہی تھی   اور وہ سنبھل نہ سکیں ۔بھارتی " سائن اینڈ ٹی وی آرٹسٹس ایسوسی ایشن "کے جنرل سیکرٹری امت بہل نے  اداکارہ کی وفات  کی تصدیق کی۔ انہوں نے اداکارہ کے انتقال پر افسوس کرتے ہوئے  کہا کہ کورونا کی دوسری لہر    بہت سی قیمتی جانیں نگل  چکی ہے، سری پراڈھا نے ہندی اور ساؤتھ سینما کے لیے  انتھک کام کیا ہے،ہمارے لیے  بدقسمتی کی بات ہے کہ ہم ایک سینئر اداکارہ سے محروم ہو گئے ہیں۔

خیال  رہے کہ سری پراڈھا نے ہندی اور بھوج پوری انڈسٹری سے تعلق رکھنے والے   بہت سے بڑے ناموں کے ساتھ کام کیا تھا۔ انہوں نے   ماضی میں   بالی وڈ اداکار گووندا، دھرمیندر، ونود کھنہ، گلشن گروور اور دیگر کے ساتھ بھی کام کیا ۔ اداکارہ کی بالی وڈ فلموں میں آگ اور چنگاری، شعلے اور طوفان، آزمائش، بے وفا صنم، میری للکار سمیت کئی فلمیں شامل ہیں۔

واضح  رہے کہ بھارت میں کورونا کی صورتحال انتہائی سنگین شکل اختیار کرچکی ہے ،  امریکہ سمیت برطانیہ ، جرمنی ، اٹلی اور سنگاپور ، آسٹریلیا  نے بھی  بھارت پر سفری پابندیاں عائد کردی ہیں جبکہ کینیڈا ، ہانگ کانگ اور نیوزی لینڈ نے بھارت  کے ساتھ تمام تجارتی رابطے بھی  معطل کردیے ہیں ۔