امید ہے الیکشن کمیشن مناسب وقت میں حلقہ بندیاں مکمل کر لے،نگران وزیر اعظم

نگران وزیراعظم انوار الحق کاکڑ کا کہنا ہے کہ الیکشن کا ٹائم فریم نہیں دے سکتے، نگران حکومت کی ذمہ داری انتخابات میں معاونت ہے۔ ہم اپنے آئینی مینڈیٹ سے آگے نہیں بھر سکتے۔ کسی بھی رجسٹرڈ سیاسی جماعت کو الیکشن میں حصہ لینے سے نہیں روکا جا سکتا۔امید ہے کہ الیکشن کمیشن مناسب وقت میں حلقہ بندیاں مکمل کر لے گا۔

غیر ملکی میڈیا کے نمائندوں سے گفتگو کرتے ہوئے انوار الحق کاکڑ نے کہا کہ ایف بی آر اور توانائی کے شعبوں میں اصلاحات کی ضرورت ہے، ہم صرف مختصر اصلاحات کر سکتے ہیں جن کے مستقبل کا فیصلہ آئندہ منتخب حکومت کرے گی۔ آئینی طور پر ملک کے نظام میں بڑی تبدیلی نہیں لا سکتے، تمام شعبوں کیلئے بجٹ مختص کرنا پارلیمنٹ کا کام ہے۔

نگراں وزیراعظم کا کہنا تھا کہ اپنے دائرہ اختیار میں رہتےہوئے معاشی اور مالی معاملات کو آگے بڑھا رہے ہیں، خصوصی سرمایہ کاری کیلئے سہولت کونسل کو آگے بڑھانا اہم ترجیح ہے، کونسل کے تحت زراعت، کان کنی اور معدنیات جیسے شعبے ترجیح ہے۔

انوار الحق کاکڑ نے مزید کہا ہماری مغربی سرحد سے ملک کے اندر حملے ہو رہے ہیں، اپنے شہریوں کے تحفظ کیلئے تمام اقدامات کر رہے ہیں، افغانستان میں امریکا اور ان کے اتحادیوں کا چھوڑا ہوا اسلحہ بڑا چیلنج ہے۔

نگران وزیراعظم کا کہنا تھا کہ سول ملٹری بہترین ہم آہنگی کی مثال بٹگرام میں دیکھنے کو ملی، سول ملٹری قیادت مل کر آگے بڑھ رہی ہے، چین کے ساتھ ہمارے مضبوط اور گہرے تعلقات ہیں، پاکستان پانچ دہائیوں سے افغانیوں کی میز بانی کررہا ہے۔