فلسطینی صدر محمود عباس کا امریکی وزیر خارجہ ٹونی بلنکن سے ٹیلی فونک رابطہ

فلسطینی صدر محمود عباس نے امریکا سے مطالبہ کیا ہے کہ وہ فلسطینی شہریوں پر عائد پابندیاں ختم کرے اور فلسطین کےساتھ تعلقات معمول پر لائے۔

غیر ملکی خبر رساں ایجنسی کے مطابق  انہوں نے یہ مطالبہ گزشتہ روز امریکی وزیر خارجہ انٹونی بلنکن کے ساتھ ٹیلی فونک رابطے کے دوران کیا۔

ٹیلی فونگ گفتگو کے دوران فلسطین کی تازہ ترین پیش رفت،مقبوضہ بیت المقدس میں امریکی قونصل خانہ اور واشنگٹن میں فلسطین لبریشن آرگنائزیشن کے دفتر کو دوبارہ کھولنے سمیت دو طرفہ تعلقات کو مضبوط بنانے کے طریقوں پر تبادلہ خیال کیا گیا۔

انہوں نے امریکی انتظامیہ سے مطالبہ کیا کہ وہ سلامتی کونسل کے فیصلے کے ذریعے اقوام متحدہ میں مکمل رکنیت حاصل کرنے کے لیے فلسطین کی کوشش کو قبول کیا جائے۔

فلسطینی صدرنے کہا کہ اسرائیلی افواج اور آباد کار دو ریاستی حل کو کمزور اور جارحانہ طرز عمل کے ذریعے امن کے حصول کے تمام امکانات کو تباہ کر رہے ہیں۔ انہوں نے زور دیا کہ اسرائیلی حکام کو ان تمام خلاف ورزیوں کو روکنے کے لیے پابند کرنے کی ضرورت ہے۔