چیف جسٹس نے اپنی اننگ کی آخری بال پر زبردست چھکا مارا ہے،شیخ رشید

عوامی مسلم لیگ کے سربراہ اور سابق وفاقی وزیر داخل شیخ رشید احمد نے کہا ہے کہ نیب ترامیم کالعدم قرار دے کر چیف جسٹس عمرعطاء بندیال نے اپنی اننگ کی آخری بال پر زبردست چھکا مارا ہے 

سماجی رابطے کی ویب سائٹ ایکس پر اپنے ویڈیو پیغام میں شیخ رشید کا کہنا تھا کہ چیف جسٹس عمرعطاء بندیال نے اپنی اننگ کی آخری بال پر زبردست چھکا مارا اور جنہوں نے پانی ذات کے لئے قانون بنائے تھے کہ نیب کو 50 کروڑ سے کم مالیت کی کرپشن کیسز کی تحقیقات کی اجازت نہیں اور وہ جنہوں نے 16 مہینوں میں صرف اپنے کیسز ختم کرائے اور یہ تاثر دینے کی کوشش کی کہ ہم گنگا نہائے ہیں، آج وہ خاک وہی پر پہنچ گئی جہاں کا خمیر تھا۔

pic.twitter.com/TJtchZqNiF

— Sheikh Rashid Ahmed (@ShkhRasheed) September 15, 2023

انہوں نے کہا کہ حالات اور واقعات بتائیں گے کہ اس فیصلے کے کتنے دور رس نتائج ہوں گے۔ کرپشن کوئی بھی کرے سب کو قانون کے شکنجے میں آنا چاہیے سب سے اچھی بات یہ کیسز وہی سے شروع ہوں گے جہاں سے اس کو لپیٹ دیا گیا تھا،جہاں سے اس کی تحقیقات کا گلا گھونٹ دیا گیا تھا۔ ان سارے لٹیروں، ڈاکوؤں، چوروں اور عوام کا خون چوسنے والوں کو واپس آ کر قانون کا سامنا کرنا چاہیے تاکہ لوگوں کو بھی پتہ چلے کہ چور کبھی بھی چوکیدار نہیں بن سکتا۔

سربراہ عوامی مسلم لیگ نے کہا کہ غریب مہنگائی سے، بجلی کے بلوں سے، بے روزگاری سے، بچوں کے سکولوں کی فیسوں سے مر رہا ہے اور یہ لوگ اربوں کھربوں لوٹ کر منہ صاف کرکے لندن بھاگ گئے جو ان کی اصل قیام گاہ ہے، جہاں وہ جائیدادوں کی خریدو فروخت کرتے رہے ہیں۔

شیخ رشید نے کہا کہ انشاء اللہ پاکستان ترقی کرے گا اور آگے جائے گا،ہمارے عزیم ادارے اور عزم افواج ہے، ان چوروں کو نکیل ڈالی جائے گی جنہوں نے پاکستان کو لوٹا ہے،عوام کا نام ہی ریاست ہے، عوام خوشحال ہو گی تو ریاست خوشحال ہو گی۔