سعودی ولی عہد جلد پاکستان کا دورہ کریں گے، نگراں وزیر خارجہ

لندن: نگراں وزیر خارجہ جلیل عباس جیلانی کا کہنا ہے کہ سعودی ولی عہد محمد بن سلمان جلد پاکستان کا دورہ کریں گے۔

لندن میں پریس کانفرنس کرتے ہوئے وزیر خارجہ جلیل عباس جیلانی کا کہنا تھا کہ وہ دولت مشترکہ کی یوتھ منسٹرز کانفرنس میں شرکت کے لیے لندن آئے ہیں۔

انہوں نے مزید کہا کہ نوجوان پاکستان کا مستقبل ہیں اور حکومت ہمارے نوجوانوں کی تعلیم اور روزگار کے لیے کام کر رہی ہے۔

وزیراعظم پاکستان انوار الحق کاکڑ نے نوجوانوں کے لیے ترقیاتی منصوبوں کے لیے 80 ارب روپے کا فنڈ رکھا ہے۔

کانفرنس کے بارے میں بات کرتے ہوئے وزیر خارجہ نے کہا کہ کانفرنس میں 40 وزراء سمیت 50 ممالک نے شرکت کی۔

کانفرنس میں ماحولیاتی تبدیلیوں کے اثرات پر روشنی ڈالی گئی اور سفارشات اور احتیاطی تدابیر پر عمل درآمد کے لیے ایک ٹاسک فورس تشکیل دی گئی۔

بھارت کے ساتھ تعلقات سے متعلق سوال کے جواب میں وزیر خارجہ نے کہا کہ مقبوضہ کشمیر کی خصوصی حیثیت کے خاتمے کے بعد سے بھارت کے ساتھ پاکستان کے تعلقات منقطع ہیں۔

سعودی ولی عہد کے دورہ پاکستان سے متعلق سوال پر جلیل عباس جیلانی نے کہا کہ ولی عہد شہزادہ محمد بن سلمان جلد پاکستان کا دورہ کریں گے۔

وزیر خارجہ نے اسمگلنگ کے خلاف نگراں وزیراعظم کی کوششوں کو سراہا جس سے ڈالر کی قدر میں کمی میں مدد ملی، وزیر خارجہ نے مزید کہا کہ انتخابات مقررہ وقت پر ہوں گے۔