ہاتھی نے محکمہ جنگلات کے اہلکار کو کچل کر ہلاک کر دیا

نئی دہلی: بھارتی ریاست مہاراشٹر میں ہاتھی نے محکمہ جنگلات کے 45 سالہ اہلکار کو اس وقت کچل کر مار ڈالا جب وہ جنگلی ہاتھیوں کے ایک ریوڑ کی کھیتوں میں گھسنے کے بعد وڈیو بنا رہا تھا۔

بھارتی خبررساں ادارے کے مطابق یہ واقعہ ملک کی مغربی ریاست کے ضلع گڈچیرولی میں واقعہ ڈونگار گاؤں (حالبی) نامی جنگل میں پیش آیا۔ہاتھیوں کا ریوڑ ہفتے کی شام پانچ بجے ایک کھیت میں گھس آیا جہاں محکمے کے اہلکاروں کی ایک ٹیم کو حالات پر نظر رکھنے کے لیے روانہ کیا گیا۔

محکمے میں بطور ڈرائیور کام کرنے والے سدھاکر بی اترام نے کھیت کے نزدیک اپنی گاڑی کھڑی کی اور ہاتھیوں کے ریوڑ کی وڈیو بنانا شروع کر دی لیکن تب ایک ہاتھی اپنے ریوڑ سے الگ ہو کر اچانک ان پر حملہ آور ہو گیا۔

رپورٹ کے مطابق اس وقت باقی اہلکار تو بھاگنے میں کامیاب ہو گئے لیکن45 سالہ اہلکار اترام بھاگنے کی کوشش میں پھسل کرگر گیا۔ہاتھی نےاسے اٹھاکر اس کے ساتھیوں کے سامنے ہوا میں اچھال دیا ۔بعد میں اس کی لاش جنگل سے برآمد ہوئی۔ محکمہ جنگلات نے واقعہ کی تحقیقات کا آغاز کر دیاہے۔