چین نے امریکی دفاعی کمپنیوں پر پابندی عائد کر دی

چین نے امریکی دفاعی کمپنی لاک ہیڈ مارٹن اور نارتھروپ گرومین پر پابندیاں عائد کرنے کا اعلان کر دیا۔ چینی وزارت خارجہ کے ترجمان ماو ننگ نے کہا کہ چین نے تائیوان کو اسلحہ کی فروخت پر امریکا کی 2 دفاعی کمپنیوں پر پابندیاں عائد کرنے کا فیصلہ کیا ہے۔

انہوں نے کہا کہ امریکا نے 24 اگست کو تائیوان کے لئے ایف۔16 طیاروں کی منظوری دی ہے اور ریاست میسوری کے شہر سینٹ لوئیس میں لاک ہیڈکا شعبہ راڈار ایف۔16 طیاروں کے ساز و سامان کی فروخت کا مرکزی حصہ ہے۔ اس کے علاوہ نارتھروپ گرومین بھی تائیوان کو اسلحہ فراہم کرے گی ۔ماو ننگ نے کہا کہ تائیوان کو اسلحے کی فراہمی ون چائنا اُصول اور چین۔امریکا سفارتی تعلقات میں بنیادی حیثیت کے حامل تین مشترکہ اعلامیوں کی خلاف ورزی ہے۔

ترجمان نے مزید کہا کہ یہ بین الاقوامی قانون اور بین الاقوامی تعلقات کے بنیادی آداب کے برعکس ہے اور چین کی خود مختاری و سلامتی مفادات کی بھی خلاف ورزی ہے۔واضح رہے کہ امریکا نے 24 اگست کو تائیوان کو 500 ملین ڈالر کے ایف۔16 الفرا ریڈ سرچ سسٹم اور متعلقہ سازو سامان کی فروخت کی منظوری دی تھی۔