واٹس ایپ کی نئی پرائیویسی پالیسی سے پریشان صارفین کیلئے خوشخبری

تفصیلات کے مطابق صارفین کی جانب سے دن بدن سوشل میڈیا ایپلی کیشنز کے استعمال میں اضافہ دیکھا جا رہا ہے، آئے روز نئی سے نئی اپڈیٹ سامنے آرہی ہیں۔ حال ہی میں واٹس ایپ نے نئی پرائیویسی پالیسی متعارف کرائی تھی جس کے مطابقاگر صارفین نے 15 مئی تک واٹس ایپ اپڈیٹ نہیں کی تو ان کا اکاؤنٹ ڈلیٹ کردیا جائے گا، لیکن ایک بار پھر واٹس ایپ کی انتظامیہ نے صارفین کے سامنے گھٹنے ٹیک دیئے ہیں۔  واٹس ایپ نے اپنے صارفین کیلئے ایک بیان جاری کیا ہے،جس کے تحت اگر صارف نے نئی پرائیویسی پالیسی قبول نہیں کی تو 15 مئی سے ان کا اکاؤنٹ بند نہیں کیا جائے گا۔

واٹس ایپ کا کہنا ہے کہ اگر کوئی بھی صارف یہ پالیسی قبول نہیں کرے گا تو اسے یاد دہانی کیلئے بار بار نوٹیفکیشن بھیجا جائے گا۔ اگر وہ نئی عائد کی جانے والی شرائط قبول نہیں کریں گے تو ابتدائی طور پر وہ اپنی چیٹ لسٹ تک رسائی حاصل کرنے کے اہل نہیں ہوں گے۔ 

رپورٹ کے مطابق صارفین موصول ہونے والی فون کالز اور ویڈیو کالز کا پھر بھی جواب دے سکیں گے۔ لیکن آئندہ چند ہفتوں بعد کالز یا نوٹی فکیشنز موصول نہیں کر سکیں گے اور واٹس ایپ فون پر پیغامات اور کالز بھیجنا روک دے گا۔ کمپنی نے نئی شرائط کے نفاذ سے متعلق تاحال کسی تاریخ کا اعلان نہیں کیا ہے۔